Բաբերդում (թուրքական հնչմամբ՝ Բայբուրդ) կազմակերպված ազգայնամոլոկան տոնահանդեսում նահանգապետը և կազմակերպիչները շեշտը դրել են հակահայկական քարոզչության վրա՝ դեռահասների ներկայացրած բեմականացմամբ ատելություն սերմանելով «զավթիչ» հայության նկատմամբ: «Մոռանալով», որ իրենց պապերը Ալթայի տափաստաներից են եկել և տեր դարձել հայերի հայրենիքին, այդ թվում՝ հայկական Բաբերդ քաղաքին, «մոռանալով» նշել, թե ինչու՞ մոտ 2500 տարվա պատմություն ունեցող քաղաքում այսօր չեն բնակվում նրա հիմնադիրներ-բնիկները՝ հայերը, քաղաքից և ողջ նահանգից զանգվածաբար արտագաղթող բնակչությանը կոչ է արել գոնե հանգուցյալներին թաղել Բաբերդում:
Պարո’ն նահանգապետ, Բաբերդի արտագաղթի և հետամնացության պատճառը գուցե սոցիալական կամ տնտեսական չէ, այլ ձեր և ձեր նմանների մեջ կուտակված ատելությունն ու թշնամանքը ուրիշների նկատմամբ: Սա հոգեբանական մի բարդույթ է, երբ մարդու մեջ բուն դրած, առավել ևս՝ դարերով սնուցված ատելությունը ի վերջո ուղղվում է իր իսկ դեմ:
Պարոնայք ազգայնամոլներ, ուրիշից բռնագրավված ունեցվածքը, առավել ևս՝ հայրենիքը երբեք խաղաղություն կամ երջանկություն չի բերում: Գուցե մարդկանց ենթագիտակցության մեջ ապրող այս գիտակցությու՞նն է բաբերդցիների արտագաղթի պատճառը, որոնց 10 տոկոսն է, ձեր իսկ վկայությամբ, այսօր մնացել Բաբերդում:
Ընթերցողին ենք ներկայացնում լրատվամիջոցներից մեկի պատրաստված տեղեկատվությունը այս միջոցառումից:
http://akunq.net/am/ կայքէջի խմբագրություն
***
Մեծ ոգևորությամբ նշվեց Բաբերդի (Բայբուրդի)` թշնամու գրավումից ազատագրվելու 93-րդ տարելիցը:
Միջոցառումներն սկսվեցին Հյուքյումեթ հրապարակում գտնվող Աթաթուրքի արձանին ծաղկեպսակ դնելու արարողությամբ: Այնուհետև Բաբերդի նահանգապետ Քերեմ Ալը շնորհավորանքներ ընդունեց իր գրասենյակում:
Ջումհուրիյեթ պողոտայում կազմակերպված միջոցառմանը մասնակցեցին Արդարություն և զարգացում կուսակցության պատգամավորներ Ֆեթթանի Բաթթալը և Ուլքյու Գյոքալփ Գյունեյը, Բաբերդի նահանգապետ Քերեմ Ալը, Բաբերդի քաղաքապետ Հաջը Ալի Փոլաթը, շտաբի գնդապետ Ֆարուք Քայադելեն, Բաբերդի համալսարանի ռեկտորը` դոկտոր, պրոֆեսոր Մուրադ Մոլլամահմուդօղլուն, գրասենյակների ղեկավարներ և հասարակ քաղաքացիներ: Ներկայացուցչական գաղթական խմբի անցնելուց հետո մի դրամա բեմականացվեց, որը պատմում էր Բաբերդում հայ հեղափոխականների կատարած բռնությունների և խոշտանգումների մասին:
Միջոցառման ժամանակ Բաբերդի քաղաքապետ Հաջը Ալի Փոլաթը հանդես եկավ օրվա խորհրդին նվիրված ելույթով:
Փոլաթն ասաց. «Բաբերդի` թշնամու գրավումից ազատագրվելու 93-րդ տարելիցի կապակցությամբ մեր կազմակերպած այս ծրագրով պետք է ջանքեր գործադրենք, որպեսզի հանուն չմոռացման և պատմությունը վառ պահելու նման թատերական ներկայացումներով անընդհատ հիշեցնենք պատմական դեպքերի մասին, քանզի չպետք է կորչի մեր ազգային հիշողությունը: Նոր սերունդը ոչ մի դեպքում չպետք է մոռանա, թե ինչ դեպքեր են տեղի ունեցել 93 տարի առաջ այս հողերում: Ինչպես որ իրենց սերունդներին Մեծ Հայաստանի երազանքով, Արևելյան հարցի երազանքով, տաք ջրեր հասնելու երազանքով դաստիարակող հայերն ունեն իդեալներ, այնպես էլ մենք պետք է ունենանք մեծ գաղափարներ: Այդ կապակցությամբ 93 տարի առաջ այս տարածքներում տեղի ունեցած դեպքերի ժամանակ, ի հեճուկս չքավորությանը, դժվարություններին և հիվանդություններին, հերոսաբար պայքար մղած մեր նախահայրերի համար հոգու հանգստություն եմ խնդրում Ալլահից: Պատմությունը տարբեր պարտավորություններ է դրել սերունդների վրա: 93 տարի առաջ այս հողերում ապրած մարդկանց վրա դրված պատասխանատվությունը այլ էր, մեզ վրա դրված պատասխանատվությունը` այլ: Երբ հայացք ենք գցում մեր պատմությանը, տեսնում ենք, որ մեր պապերը այդ պարտավորությունները կատարել են իրենց կյանքի գնով, իսկ մեզ վրա դրված պատասխանատվությունը պահանջում է, որ մեր նախահայրերից օրինակ վերցնելով` անենք այն, ինչ մեզնից ուզում է այս հայրենիքը: Մեր պապերից կյանք է պահանջվել, տվել են, իսկ մեզնից պահանջվում է ճակատի քրտինք: Մենք պարտավոր ենք նրանցից մեզ ժառանգություն մնացած այս հայրենիքը է’լ ավելի հզորացնել, պահպանել մեր հայրենի հողը` ոչ մի դեպքում չխախտելով մեր միասնականությունը, և մեր հայրենիքը շատ ավելի շեն վիճակում հանձնել մեր հետագա սերունդներին: Մենք բոլորս պատասխանատու ենք Բաբերդի հանդեպ: Ասածս այն է, թե մենք պարտավորություններ ունենք Բաբերդի նկատմամբ: Ասում եմ, որ պարտավոր ենք անպայման բարգավաճ դարձնել Բաբերդը: Մենք` բոլոր բաբերդցիներս, պետք է դա հաջողենք` որպես մեկ ամբողջություն: Մեր շրջանում մեծ է արտագաղթողների թիվը. պարտավոր ենք այն կանգնեցնել: Աշխարհով մեկ սփռված բաբերդցիների միայն 10 տոկոսն է բնակվում Բաբերդում: Այնժամ պետք է լրջորեն մտածենք հետևյալի մասին. այսչափ հոգով չե՞նք կարողանում ծաղկեցնել Բաբերդը: Այս հոգսը պետք է բոլորինս լինի: Մենք դրա ճարն ենք փնտրում: Մենք կոչ ենք անում մեր բոլոր համերկրացիներին` ներդրումներ անել Բաբերդում: Եթե ոչ մի բան չենք կարողանում անել, գոնե ձեր հանգուցյալներին բերեք Բաբերդ: Մեր ասածն այն է, թե մի’ կտրեք ձեր կապերը Բաբերդի հետ, որովհետև մեր այս ասածներն ունեն սոցիալական, մշակութային և տնտեսական հիմնավորումներ»:
Միջոցառումների շրջանակներում տեղի ունեցան նիզակի նետման մրցույթներ, նկարների ցուցահանդես և հրանոթազարկեր, և զվարճանքները շարունակվեցին մինչև ուշ գիշեր:
21-02-2011
http://www.haber24.com/69-Bayburt-Haberleri/1-169505/93-kurtulus-coskusu.html
Leave a Reply