Ցեղասպանության զոհերի ժառանգները փոխհատուցվելու են

«Սկսած 1890-ականներից` բազմաթիվ միջազգային ապահովագրական ընկերություններ իրենց աշխատանքներն էին տանում Օսմանյան կայսրությունում: Նրանք վարձում էին հայերին` իբրև ապահովագրական գործակալներ: Այդ տարիներին կատարվեց ավելի քան 4000 գործարք»,- ԱՄՆ Ֆրեզնո քաղաքի հայկական դպրոցներից մեկում դասախոսություն կարդալու ժամանակ հայտարարել են հայտնի իրավաբաններ  Մարկ Կիրակոսն ու Բրայան Կաբատեկը: 

Դասախոսության ընթացքում իրավաբանները կենտրոնացել են ապահովագրական ընկերությունների հետ դատավարությունների վրա` նշելով, որ առաջիկայում շարունակվելու են դատերն այն ընկերությունների հետ, որոնք հրաժարվում են վճարել Ցեղասպանության զոհերի ժառանգներին: 

Massispost կայքէջի տեղեկացմամբ՝ Կիրակոսը մանրամասնել է, թե հատկապես որ դատավարական գործերն էին առավել աղմկոտ:

«Գերմանական SB ապահովագրական ընկերությունը, փորձելով վճարելուց խուսափել, քաղաքականացրեց դատավարությունը` ասելով, թե երկրի ֆեդերալ օրենքները հակասության մեջ են մտել նահանգայինի հետ, քանի որ ԱՄՆ պետությունը չի ճանաչել Հայոց ցեղասպանությունը: Մենք էլ պատասխանեցինք, որ այդտեղ հակասություն չկա, իսկ պետությունն էլ երբեք դեմ չի խոսել Ցեղասպանության ճանաչմանը: 1981-ին էլ նախագահ Ռեյգանն իր խոսքում արտասանեց «Ցեղասպանություն» բառը»,-պատմել է Կիրակոսն ու հավելել, որ առաջիկայում նոր գործեր են սպասվում, որտեղ անպայման հայկական համայնքը շահելու է:

23.02.2011

http://mardik.am/am/news/category_category_1282302066/article_11971