Դիարբեքիրի Սուրի քաղաքապետարանը քաղաքի մուտքի մոտ կախել է թուրքերենով, քրդերենով, անգլերենով, հայերենով և ասորերենով «Բարի գալուստ» մաղթող ցուցանակներ:
Դիարբեքիրի Սուրի քաղաքապետարանը քաղաքի մուտքի մոտ կախել է թուրքերենով, քրդերենով, անգլերենով, հայերենով և ասորերենով «Բարի գալուստ» գրված ցուցանակներ: Սուրի քաղաքապետ Աբդուլլահ Դեմիրբաշը նշեց. «Մենք պատկերացնում ենք այն ուրախությունը, որ կապրեն մեր քաղաք մտնող մարդիկ այն ժամանակ, երբ դեմ հանդիման կգան սեփական ինքնության և լեզվի հետ»:
Սուրի քաղաքապետարանում 2007 թ. «Բազմալեզու քաղաքապետարանության» վերաբերյալ իր կայացրած որոշումից անմիջապես հետո Պետական խորհրդի կողմից պաշտոնից հեռացված և 2009 թ. ընտրությունների արդյունքում վերստին քաղաքապետ ընտրված «Խաղաղություն և ժողովրդավարություն» կուսակցության անդամ Աբդուլլահ Դեմիրբաշը իր և խորհրդի անդամների կայացրած որոշմամբ Սուր քաղաքի երեք մուտքերի մոտ կախել է թուրքերենով, քրդերենով, անգլերենով, հայերենով և ասորերենով ցուցանակներ: Դիարբեքիրի Սիլվան ցամաքային ճանապարհին թուրքերենով և քրդերենի զազաքի բարբառով, ինչպես նաև` հայերենով գրված «Բարի գալուստ» ցուցանակները կախած քաղաքապետարանն այսօր էլ Մարդինի ցամաքային ճանապարհի վրա գտնվող Չարըքլը գյուղի մոտակայքում է ցուցանակ կախել, որում գրված է թուրքերենով, քրդերենի քուրմանջի բարբառով և ասորերենով, իսկ Սուրի քաղաքապետարանի Շանլըուրֆա ցամաքային ճանապարհի վրա մոտակա օրերին կախվելու է թուրքերեն, քրդերեն և անգլերեն «Բարի գալուստ» գրված ցուցանակ: Սուրի քաղաքապետ Աբդուլլահ Դեմիրբաշը հայտնեց, որ իրենք ցուցաբերում են «բազմալեզու քաղաքապետարանության» աշխատանքները հիմք ընդունող մոտեցում: Դեմիրբաշը նշեց նաև հետևյալը. «Մենք քաղաքի տարբեր մուտքերի մոտ տարբեր լեզուներով «Բարի գալուստ» մաղթեցինք: Դրանով իսկ ցանկացանք միաժամանակ և’ բոլորին հայտնել այս քաղաքի բազմամշակութային, բազմազգ և բազմալեզու լինելու հանգամանքը, և’ միևնույն ժամանակ մարդկանց բարի գալուստ մաղթել իրենց լեզուներով: Առաջիկա օրերին նման ցուցանակներ ենք կախելու նաև Դիարբեքիրի բերդի չորս պատերին»:
Ջիհան գործակալություն
22.02.2011
Leave a Reply