ՇԻՐԱԿԱՇԱՏ

ՇԻՐԱԿԱՇԱՏ, Մավրիկապոլիս. ավան Այրարատ նահանգի Շիրակ գավառում` Ախուրյանի Մավրիկ վտակի ձախ ափին (XXդ.սկզբին`Կարսի մարզի Կաղզվանի օկրուգի Աջամ-Մավրակ կամ Մավրիկ գյուղ, այժմ` Թուրքիայի տարածքում): Հայաստանի 591թ. 2-րդ բաժանումով անցել է Բյուզանդական կայսրությանը` դառնալով «Ներքսագույն Հայք» պրովինցիայի կենտրոնը և Արևելքի մագիստրոսի նստավայրը: Ի պատիվ Մավրիկիոս (Մորիկ) կայսեր (582-602թթ.)` Շիրակաշատը վերանվանվել է Մավրիկապոլիս:

XXդ. 1-ին քառորդին գյուղի մոտակայքում դեռևս պահպանվում էին Ս.Աստվածածին հին եկեղեցին (կիսավեր), միջնադարյան կառույցների ավերակներ, գերեզմանոց: Մավրիկ գետի աջ ափին կանգուն էր գեղեցկաշեն, գմբեթավոր մի եկեղեցի` XIIIդ. արձանագրությամբ:

1914թ.` 570 հայ բնակիչ:

Հայաթափվել է 1920թ.:

Հայկական համառոտ հանրագիտարան, Հատոր 4, Երևան, 2003: