Մեծ է հավանականությունը, որ Սևան Նշանյանին պատականող հյուրանոցային տներն այսօր քանդվեն

Ինչպես «Ակունքի» թղթակցին հաղորդեց «Ակօս» շաբաթաթերթի հայկական էջի խմբագիր Բագրատ Էսթուքյանը, մեծ է հավանականությունը, որ Սևան Նշանյանին պատկանող հյուրանոցային տներն այսօր` փետրվարի 17-ին, քանդվեն: Ըստ Բագրատ Էսթուքյանի` պոլսահայ հայտնի մտավորական և «Ակօս»-ի աշխատակից Սևան Նշանյանը շատ խիզախ անձնավորություն լինելու պատճառով հակասում է երկրի  պաշտոնական գաղափարախոսության բոլոր տեսություններին: Թուրքիան, որպես իթթիհադական ու քեմալական գաղափարախոսությունների վրա հիմնված ազգային մի պետություն, լուրջ վտանգ է Սևան Նշանյանի համար, վերջինս էլ, բնականաբար, լուրջ թիրախ` պետության համար:

«Ակօս»-ի հայկական էջի խմբագիրը, Նշանյանին բնութագրելով որպես «չափից դուրս խիզախ մի անձնավորություն», ընդգծեց, թե նրա գաղափարները հակասում են Թուրքիայի պաշտոնական գաղափարախոսության բոլոր տեսություններին: Նշանյանը, Էսթուքյանի խոսքերով, արհամարհում է պաշտոնական գաղափարախոսությունը, և իր դեմ լարվածության առաջացումն ուղղակի անխուսափելի դարձնում: Բագրատ Էսթուքյանի կարծիքով Նշանյանի հյուրանոցային տները քանդելու որոշումն էլ, թերևս, Նշանյանի խիզախ կեցվածքի արդյունքն է, քանի որ իրականում ուղղակի զավեշտ է նրա կառուցած տներն անօրինական շինություններ որակելը: Մի քանի ամիս առաջ հաղորդվել էր այս կառույցները քանդելու որոշման մասին, որին ի պատասխան` Սևան Նշանյանը հայտարարել էր. «Դուք ոչինչ էլ չեք կարող անել, դուք անճարակ մարդիկ եք, և ես մի աշտարակ պիտի կառուցեմ, որը կրելու է «ասպարեզ կարդալու աշտարակ» անվանումը»:

Ինչպես նշեց Բագրատ Էսթուքյանը, մեծ է հավանականությունը, որ այսօր` փետրվարի 17-ին, պետության կողմից լիազորված անձինք քանդեն Նշանյանի հյուրանոցային տները: Ըստ Էսթուքյանի` դեռևս մի քանի ամիս առաջ Նշանյանը խնդրել է իր գործընկերներին գալ Շիրինջե և նեցուկ լինել իրեն: «Ակօս»-ի խմբագրությունը անգամ մտահղացում է ունեցել ժամանակավորապես տեղափոխվել այնտեղ:

Նշանյանը հուսով է, որ եթե հյուրանոցային համարները լցված լինեն այցելուներով, պետությունը չի համարձակվի քանդել դրանք: Այդ նպատակով էլ փետրվարի 16-ի գիշերը ավտուբուսներով պոլսահայեր են գնացել Շիրինջե` զորավիգ լինելու Նշանյանին: «Ակօս» շաբաթաթերթի հայկական էջի խմբագիրը կոչ արեց բոլորին՝ նեցուկ կանգնել Նշանյանին և թույլ չտալ քանդել նրա կառուցած շինությունները: