«Հայ-թուրքական երկխոսությունը տապալվեց, սակայն ես կարծում եմ, որ պաշտոնական երկխոսությունից առավել կարևոր է նաև ոչ պաշտոնական` քաղաքացիական երկխոսությունը, որից էլ կարող է որոշակի արդյունք լինել»,- այս մասին լրագրողների հետ հանդիպման ժամանակ հայտարարեց թուրք իրավապաշտպան և հրատարակիչ Ռագըբ Զարաքօլուն:
Նա նշեց, որ Հայոց Ցեղասպանության ճանաչումը Թուրքիային չի նվաստացնի, այլ հակառակը` ավելի կզորեղացնի. «Սակայն, եթե մենք ուզում ենք կանխել նման ոճրագործությունները, պետք է նախ ասել, որ այն այլևս չի կրկնվի, ապա` ընդունել նախորդ սխալները»:
Ռագիբ Զարաքօլուի խոսքերով` Թուրքիայի կողմից Ցեղասպանության չընդունումը գաղափարախոսական է ու հոգեբանական: Միևնույն ժամանակ նա ընդգծեց ֆինանսական փոխհատուցումների հարցը. «Օսմանյան կայսրությունում ապրող յուրաքանչյուր անձ, ում հանդեպ տեղի է ուեցել ոճրագործություն` լինի դա քուրդ, հայ կամ մեկ այլ ազգի, պետք է փոխհատուցում պահանջի»:
Իրավապաշտպանը նշեց, որ եթե Հայաստանը և Թուրքիան հասնեն ինչ-որ պայմանավորվածության, ապա դա չի խանգարի, որ Սփյուռքում ապրող հայերն իրենց իրավունքները պահանջեն Թուրքիայից:
«Ես երազում եմ, որ Թուրքիան, վերջապես, ընդունի Հայոց Ցեղասպանությունը: Ես հավատում եմ, որ դա մի օր տեղի կունենա»,- ամփոփեց իր խոսքը թուրք իրավապաշտպանը:
Aysor.am
Leave a Reply