Շվեդիայի ինտեգրացիայի նախարար Ուլլենհագն ակնարկել է, թե Հիտլերը ոգեշնչվել է Թուրքիայից

Ուլլենհագը, ելույթ ունենալով Հրեական ցեղասպանության զոհերի ոգեկոչման օրվան նվիրված հավաքույթում, պնդեց, թե 1915 թ. հայերը, ասորիները և քաղդեացիները ենթարկվել են ցեղասպանության:

Շվեդիայում փոքրամասնություն կազմող կենտրոնական աջ կոալիցիայի կառավարության լիբերալ կուսակցության անդամ, Շվեդիայի ինտեգրացիայի նախարար Էրիկ Ուլլենհագը թուրքերին մի կշեռքի նժարին դրեց աշխարհի ամենաարյունարբու բռնապետ Ադոլֆ Հիտլերի և Սադամ Հուսեյնի հետ:

Ուլլենհագը, ելույթ ունենալով Հրեական ցեղասպանության զոհերի ոգեկոչման օրվան նվիրված հավաքույթում` պնդեց, թե 1915 թ. հայերը, ասորիները և քաղդեացիները ենթարկվել են ցեղասպանության: Շվեդիայի նախարարը, հղում անելով Ադոլֆ Հիտլերի ելույթներից մեկին, պնդեց, որ Առաջին աշխարհամարտի ժամանակ թուրքերի կողմից ցեղասպանության են ենթարկվել մոտ մեկ միլիոն հայ ու կես միլիոն ասորի և քաղդեացի: Անցյալ տարվա մարտ ամսին Շվեդիայի խորհրդարանի կողմից ընդունված Ցեղասպանության նախագծին դեմ դուրս եկած և նախագծի` խորհրդարանում չանցնելու համար ջանքեր գործադրած կոալիցիոն կառավարության համախոհներից Ֆոլկ կուսակցության անդամ Ուլլենհագի վերոհիշյալ խոսքերը որակվեցին որպես հակասություն: Ուլլենհագի տարաբախտ ելույթը ներկայացվել է ոչ միայն Շվեդիայի կառավարության պաշտոնական կայքում, այլև` Շվեդիայում հրապարակվող հայկական և ասորական կայքերում:

Ուլլենհագը Ստոկհոլմի սինագոգներից մեկում ունեցած իր ելույթի ընթացքում ասել է հետևյալը. «Հիշե’ք 1970-ական թթ. կարմիր խիմերների Կամբոջան, 1980-ականներին քրդերի սպանությունները Սադամ Հյուսեյնի կողմից, Բոսնիայի և Ռուանդայի ցեղասպանությունները 1990-ականներին և Դարֆուրի կոտորածը 2000-ական թթ.: Ասում են, թե Ադոլֆ Հիտլերն օգտագործել է հետևյալ արտահայտությունը. «Ո՞վ է հիշում հայերին»: Հիտլերը հղում էր անում այսօրվա Թուրքիայում Առաջին համաշխարհային պատերազմի ժամանակ մեկ միլիոն հայերի և կես միլիոն ասորիների և քաղդեացիների դեմ իրագործված ցեղասպանությանը: Ոչ ոք երբեք չպետք է լսի` «Ո՞վ է հիշում հրեաներին» բառերը: Հրեական ցեղասպանությունից մազապուրծ եղողների պատվին ամենափոքր բանը, որ կարող ենք անել, տեղի ունեցածը շարունակաբար հիշելն է և դեպքերի մասին տեղեկություններ պահպանելը: Եթե ցեղասպանությունը ժխտողներին թույլ տրվի շահել պատմության պատերազմը, ցեղասպանության զոհերը կենթարկվեն անըմբռնելի անարդարության, և այդ դեպքում կմեծանա նման դեպքերի կրկնվելու վտանգը»:

Ջիհան լրատվական գործակալություն

31.01.11