Օրդու գավառի Գյուրգենթեփեի քաղաքապետարանի քաղաքապետ, Ժողովրդավարական ձախ կուսակցության անդամ Հալիս Բայքարան սկսել է աշխատանքներ ծավալել, որպեսզի կյանքի կոչի մի նախագիծ, ըստ որի` տարբեր հավատքների տաճարները գտնվելու են կողք կողքի, և դրա միջոցով շեշտվելու է հավատքի ազատությունը:
Նախատեսվում է «Հավատքի այգի, ազատության հրապարակ» անվամբ նախագիծը կյանքի կոչել Գյուրգենթեփե գավառի Աքորեն թաղամասում` Օլդուդերեսե վայրում` ընդարձակ մի հողակտորի վրա: Քանի որ անցյալում գավառում ալևի, սուննի և հայ քաղաքացիներն ապրել են համատեղ, քաղաքապետ Բայքարան նպատակ ունի խաղաղություն և հանդուրժողականության հաղորդագրություն հղել` մզկիթի, եկեղեցու և ջեմեվիի մոդելների` համատեղելու նախագծի միջոցով:
“Ակօս”-ի հետ հարցազրույցի ժամանակ Բայքարան ասաց. «Ցանկանում ենք նախագիծը կյանքի կոչել, որպեսզի Թուրքիայում և աշխարհում մարդկանց դավանանքները ազատորեն կարողանան դրսևորվել: Մեր նպատակն է շեշտել դավանանքի ազատությունը չմոռանալով, որ մարդիկ միասին ապրել են, խաղաղ թեյ և սուրճ խմել կարողացել, նույն օդը շնչել: Ցանկանում ենք ուղերձ հղել, որ ինչպես անտառներում կողք կողքի ապրում են ծառերի տարբեր տեսակներ, այնպես էլ մարդիկ կարող են հանգիստ միասին ապրել»:
Բայքարան հայտնելով, որ շրջանում դեռևս հայեր են ապրում, նշեց. «Նրանց մեծ մասը ձուլվել է: Ես հայ ընկերներ և ծանոթներ ունեմ: Նրանց էլ եմ ասել նախագծի մասին: Հուզվեցին: Հուզախռով եղան ասելով, թե «միգուցե սխա՞լ հասկացանք»: Կարիք չկա անհանգստանալու, որովհետև Գյուրգենթեփեյում ժողովուրդը շատ լավ մոտեցում է ցուցաբերել նախագծին և աջակցում է դրան»:
Նախագիծը, որը պաշտամունքային վայրերի հետ մեկտեղ ներառում է ռեստորան, տաղավար, նստարաններ և զբոսայգիներ, այցելուներին հնարավորություն կտա տեսնել նաև շրջակա միջավայրի գեղեցկությունը:
Չկարողացանք տեր կանգնել մեր մշակույթին
Բայքարան նշելով, որ Օլդուդերեսի անվանումը, որտեղ տեղ է գտնելու «Հավատքի այգին և ազատության հրապարակը», առաջացել է 1500-ական թթ. հրդեհի ժամանակ հայերի զոհվելու պատճառով, ասաց. «Ցավոք, չկարողացանք պահպանել մեր մշակույթը: Սողանքների և ավերման պատճառով եկեղեցին փլվեց»:
Ակօս, թիվ 771
14.01.2011
Leave a Reply