Իշխանության գալ` հայ սպանելով

Էնգին Արդըչ

Կա մի նշանակալի տարբերություն` նոր իթթիհադականների և նախկին իթթիհադականների միջև. նախկիններն իրենց իշխանությունը մի լավ ամրապնդելուց հետո էին անցնում հայ կոտորելուն, իսկ սրանք ծրագրել են հայ սպանել, որպեսզի կարողանան իշխանության գալ:

Աստված վկա, մի հայացք գցեցի ցուցակի վրա. Հրանտ Դինքի գլխավորությամբ` Էթիեն Մահչուփյան, Սևան Նշանյան, պատրիարք Մեսրոպ Մութաֆյան…

Հո միայն Հայ առաքելական եկեղեցու հետևորդներին չէին սպանելու. «զանազանություն մտցնելու» համար ցուցակում ընդգրկված են եղել նաև կաթոլիկ քահանաներ, հայր Անդրեա Սանտորոն, բողոքական հրատարակիչներ և այլք…

Որպեսզի ուղղափառներին չնեղացնեն, ներառել են նաև պատրիարք Բարդուղիմեոսին:

Այդպիսով, «առաջին փուլում»` 19 հոգի:

«Ձեր հոտառությանը» թողնենք այն հարցը, թե երկրորդ փուլում քանի մուսուլման գրող-մրող է նախատեսվել:

Նրանք ունեն տարբեր մեթոդներ. երբեմն սպանում են և անմիջապես թողնում-փախչում, երբեմն էլ, ինչպես որ դա եղավ Մալաթիայի դեպքում, «այս գործից հաճույք ստացող սադիստ մոլագարների գործի դնելով»` զոհերին սպանում են` կտտանքների ենթարկելով: (Տեղյա՞կ էիք արդյոք, որ սեպտեմբերի 12-ի դեպքի ժամանակ 450 հոգի սպանվել է կտտանքների միջոցով: Խնդիրը դուրս էր եկել «բա էլ ի՞նչ անենք, եթե չկախենք» մակարդակից և հասել «եթե կտտանքների չենթարկենք, բա հաճույք կստանա՞նք» մակարդակին…):

Դա սովորելու էր նաև նորին մեծություն Արդարության վրա ձու նետած անգրագետ սրիկան:

Ինչի՞ համար պետք է սպանվեին այդ հայերը: «Դա կազմակերպել է մեզ իր կազմում ընդգրկել չցանկացող ԵՄ-ն» անամոթ սուտը տարածել կարողանալու համա՞ր, ինչպես որ եղավ Հրանտ Դինքի դեպքում: Ո’չ, պարոնայք, «Իսլամիստներն են անում» կոչեցյալ ղեկը պահել կարողանալու համար, որպեսզի հնարավոր լինի հետևից հարված ստանալ, և հայ քաղաքացիները փրկված լինեն վայրագ կրոնամոլների ձեռքից: Սակայն այս ոճրագործությունների շարքը հենց այնպես տեղը չէր կարող սկսվել… Մի հիմնավորում էր անհրաժեշտ, մղիչ մի կայծ…

Դա էլ, անշուշտ, եղավ մզկիթի վրա ռումբ նետելը: 60-ականներին մի խումբ տխմարներ իրենց ափերից դուրս էին եկել ասելով, թե «կոմունիստները ռումբ են նետել մզկիթի վրա», հիմա էլ դա…

Անգամ այնպիսի վայրերում, ինչպիսիք են Ֆաթիհը, Էյուփը, Իսմայիլաղան, կատարվել է «տեղանքի ուսումնասիրություն»:

Ոչ մահմեդականները հարձակվում են նամազ անողների վրա, վերջիններս էլ անպատասխան չեն թողնում, է’հ, մեր առյուծներին էլ այլ բան չի մնում, քան խլել իշխանությունը: Խաղաղություն, կարգուկանոն, միասնություն և այլ նման բաներ:

Եթե ես «ռազմական դպրոցներից» մեկում (նախընտրելի է` «շտաբի սպաների դպրոցը») ուսուցիչ լինեմ, այդ ծրագիրը կազմած աշակերտին երկուս կնշանակեմ:

Սակայն իրականում այս հարցի թույլ կողմը հայտնի է հետևյալից.

Պարզվում է` հեղաշրջման հեղինակները չեն ցանկացել միայն մտավորականների մաման լացացնել:

Բազմաթիվ  բարձրաստիճան սպաների, հիմնականում` 16 ադմիրալների, նույնիսկ որոշ բանակի և ուժային հրամանատարների ձերբակալելով` ծրագրել են բացել առագաստանավերը: (Հետագայում հորինվելու էր, թե իբր նրանք «պաշտանաթող են եղել առողջական խնդիրներ ունենալու պատճառով: Ոմանց ատրճանակով սպառնալով` ստիպելու են ստորագրել «սեփական կամքով պաշտոնաթող լինելու» մասին դիմումը): Բայց այս իրավիճակում ոչ ոք կուլ չէր տալու «միակ բռունցքի» ներկայացումը, «հրաման ու հրամանատար շղթայի» մասին դատարկաբանությունը: (Օրինակ` փաստաթղթերը գաղտնի պահեստներից ասպարեզ բերածները դարձյալ եղան մեր ազնիվ և արժանապատիվ սպաները): Այդ դեպքում էլ գործը հեշտ չէ, որովհետև հեղաշրջումը կհիշեցնի առավոտ կանուխ վեր կացածի և իշխանությունը հանպատրաստից խլածի սովորական «բանանային հանրապետության մի դեպք»:

Սակայն խնդիրը խրթին է հատկապես հետևյալ առումով. Անկարայում գտնվող ամերիկյան դիվանագետները, հատկապես արտակարգ և լիազոր դեսպանը, համաձայն Wikileaks-ի փաստաթղթերի, Վաշինգտոնին հաղորդել են, թե «անհանգստությամբ» են վերաբերվել դրությանը: Սպայակույտի անդամ եղել ես, բայց չես կարողացել իմանալ, որ ՆԱՏՕ-ի անդամ որևէ երկրում առանց Ամերիկայի աջակցության, հավանության, թույլտվության կամ առնվազն` հանդուրժողականության ոչ մի հեղաշրջում չի կարող իրականացվել: Հենց դրա համար էլ իմ աշակերտին անբավարար նշանակեցի: Միգուցե նա կարող է չկտրվել մարմնամարզությունից: Դա էական չէ:

http://www.sabah.com.tr/Yazarlar/ardic/2011/01/21/ermeni_oldurerek_iktidara_gelmek