Մարդինից հետո` Դիարբեքիրում

Մարդինի Արթուքլու համալսարանից հետո Դիարբեքիրի (Տիգրանակերտ) Դիջլե համալսարանում հիմնված կենտրոնում բացվել է քրդերենը, հայերենը, զազայերենը, ասորերենն ու արաբերենը ներառող լեզուների վարչություն:

Մարդինի Արթուքլու համալսարանում որոշ ժամանակ առաջ բացված «Կենդանի լեզուների ինստիտուտից» հետո, որում ընդգրկվել են քրդերենը, արաբերենը և ասորերենը, Դիարբեքիրի Դիջլե համալսարանում նույնպես հիմնվել է «Կենդանի լեզուների կենտրոն», որի վարչության և բացման մասին որոշումն ընդունվել է համալսարանի սենատի կողմից:

Կենտրոնը գործելու համար սպասում է Բարձրագույն կրթության խորհրդի (YÖK) վավերացմանը: Խորհրդի հաստատումից հետո «Կենդանի լեզուների կենտրոնում», ինչպես նաև` համալսարանի տարբեր բաժիններում քրդերենը, հայերենը, զազայերենը, ասորերենը և արաբերենը կդասավանդվեն որպես ընտրովի դաս, դասընթացներ կկազմակերպվեն տվյալ լեզուները սովորել ցանկացող ուսանողների և ոչ ուսանող քաղաքացիների համար, բացի այդ` ուսումնասիրություններ կկատարվեն այդ կենդանի լեզուների վերաբերյալ, և կհիմնվի արխիվ: Դիջլե համալսարանի գլխավոր քարտուղար, դոկտոր, պրոֆեսոր Սաբրի Էյիգյունն ասաց, որ Թուրքիան և տարածաշրջանը բավականին հարուստ է` լեզուների առումով, և որ այնպիսի մի վայրում, որտեղ հարյուրավոր մարդիկ տարբեր լեզուներով են հաղորդակցվում, դրանք ուսումնասիրելը, այդ լեզուների մասին հասարակայնությանը տվյալներ հաղորդելը համալսարանների պարտականությունն է:  

Դոկտոր, պրոֆեսոր Էյիգյունը հայտնելով, որ շրջանում և Դիարբեքիրում խոսվող լեզուների վերաբերյալ համալսարանում աշխատանքներ իրականացնելու մասին իրենք ժամանակ առ ժամանակ պահանջներ են ստանում նաև քաղաքացիական հասարակությունից, նշեց նաև, թե այդ պահանջը հաղորդել են Բարձրագույն կրթության խորհրդին (YÖK):

Էյիգյունը նաև հետևյալն ասաց այդ կապակցությամբ. «Մեր վարչության մասին որոշումն ուղարկեցինք նաև Բարձրագույն կրթության խորհրդին: Վերջինս ուսումնասիրում է այն: Կարծում եմ, որ կարճ ժամանակահատվածում կհաստատի: Վավերացումից հետո մեր կենտրոնը կսկսի գործել»:

19.01.2011

http://www.gazetemen.com/mardinden-sonra-diyarbakirda-30129n.htm