Պոլսահայ հայտնի գործիչ, «Ակօս» թերթի գլխավոր խմագիր Հրանտ Դինքի սպանության 4-րդ տարելիցի հիշատակման արարողությանը «Ակօս»-ի խմբագրության դիմաց տեղի ունեցած ակցիային մասնակցել են հազարավոր քաղաքացիներ:
Ինչպես տեղեկացնում է NEWS.am-ի թղթակիցը Ստամբուլից, Հրանտ Դինքի հիշատակման արարողությանը Դինքի ընտանիք հետ մեկտեղ ակցիային ներկա են եղել պատգամավորներ Ուֆուք Ուրասը, Աքըն Բիրդալը, Սեբահաթ Թունջելը, Milliyet-ի սպանված խմբագիր Աբդի Իփեքչիի դուստրը, մի շարք հայտնի լրագրողներ:
«Ակօս»-ի խմբագրության ուղղությամբ մոտեցող խմբերը հնչեցրել են «Իշխող կուսակցությունը լռում է, մարդասպանին թաքցնում է», «Բոլորս հայ ենք», «4 տարի է, ինչ արդարություն չկա», «Մարդասպան պետությունը հաշիվ է տալու» կարգախոսները: Նրանց ձեռքին եղել են Դինքի նկարներով պաստառներ:
Հիշատակի միջոցառումը նախատեսված էր 15:00-ին, սակայն 30 րոպե առաջ արդեն «Ակօս»-ի առջեւ մեծ բազմություն էր հավաքված, իսկ թուրքական հայտնի հեռուստաընկերությունների մեքենաներն իրենց ուղիղ եթերի համար նախատեսված սարքավորումներով դեռեւս առավոտյան ժամերից էին տեղ զբաղեցրել:
Հիշատակման միջոցառման ավարտից հետո հազարավոր քաղաքացիները կարգախոսներ հնչեցնելով շարժվել են մինչեւ Թաքսիմի հրապարակ:
Հունվար 19, 2011
Leave a Reply