Ստամբուլում հանդիպեցին Դիարբեքիրի տարբեր հավատքների ներկայացուցիչները

Սուրի քաղաքապետարանի կողմից ստեղծված պատվիրակությունը հանդիպեց Թուրքիայի տարբեր հավատքների կրոնականների հետ, որպեսզի պատմի Դիարբեքիրի այգու տարբեր ծաղիկների՝ միասին ապրելու նախագծի մասին:

Սուրի քաղաքապետ Աբդուլլահ Դեմիրբաշից, Զահիթ Չիֆթքուրայից (Կրոնականների օգնության և համերաշխության միության նախագահ), Էրգյուն Այըքից (Սուրբ Կիրակոս հայկական եկեղեցու վաքըֆի նախագահ), Ջան Շաքարերից (Սուրբ Մարիամ ասորական եկեղեցու վաքըֆի նախագահ), Մուհամմես Աքարից (Միջկրոնական երկխոսության պլատֆորմի ներկայացուցիչ), Յըլմազ Դեմիրայից (Եզդիական կրոնի ներկայացուցիչ), Նաքշի Սայարից (Սուրի քաղաքապետարանի խորհրդի անդամ, գաղափարական առաջնորդ) և Մ. Ռեմզի Աքգյուլից (Սուրի քաղաքապետարանի Հատուկ գրասենյակի տնօրեն) կազմված պատվիրակությունը Ստամբուլում իրականացրեց մի շարք հանդիպումներ:

Պատվիրակության անդամները Ստամբուլում հանդիպումներ ունեցան լրագրողների, Գրողների հիմնադրամի նախագահ Մուսթաֆա Յեշիլի, Թուրքիայի քելդանի համայնքի հոգևոր առաջնորդի փոխանորդ Յուսուֆ Սաղի, Թուրքիայի ասորիների ուղղափառ պատրիարքի փոխանորդ մետրոպոլիտ Յուսուֆ Չեթինի, Ստամբուլի հունաց պատրիարք Բարդուղեմեոսի, Թուրքիայի հրեաների խախամբաշի, ռաբբի Իսհակ Հալևայի, Պոլսո Հայոց պատրիարքի փոխանորդ Արամ Աթեշյանի, հրեական համայնքի 500-րդ տարի վաքըֆի նախագահ Նաիմ Գյուլերյուզի, Ավ. Քեզբան Հաթեմի և Թուրքիայի ճանապարհորդական գործակալությունների նախագահ Բաշարան Ուլուսոյի հետ:

Սուրի քաղաքապետ Աբդուլլահ Դեմիրբաշը, տեղեկություններ հաղորդելով էքսկուրսիաների վերաբերյալ, նշեց, որ շատ կարևոր են Դիարբեքիրի՝ կյանքի կոչվող Մշակույթի փողոցում գտնվող պատմական վայրերը, և որ  Ստամբուլ են եկել, որպեսզի պատմեն Դիարբեքիրի այգու տարբեր ծաղիկների՝ միասին ապրելու նախագծի մասին: Դեմիրբաշը հայտնելով, որ այս նախագիծը միևնույն ժամանակ խաղաղության և ժողովրդավարության նախագիծ է, ասաց, որ Ստամբուլում հույների, հերաների, հայերի և ասորիների ներկայացուցիչների, գաղափարական և կրոնական առաջնորդների, հասարակական կազմակերպությունների ներկայացուցիչների հետ հանդիպումներ են ունեցել, և որ այդ հանդիպումները շատ դրական մթնոլորտում են անցել:

Դեմիրբաշը հայտնեց, որ Բույուքշեհիրի քաղաքապետարանի հետ համատեղ իրականացվող Մշակույթների փողոց նախագծի շրջանակներում մինչ այժմ ծախսել են երկու միլիոն եվրո, այնուհետև նշեց, որ նախագծի շրջանակներում շարունակվելու է քելդանի, ինչպես նաև հայկական Սուրբ Կիրակոս եկեղեցու բարեկարգումը, Յենի Քափը թաղամասում գտնվող սինագոգի ավերակները վերանորոգելու են:

Դեմիրբաշը տեղեկացրեց, որ, քաղաքապետարանը ալևի և եզդի հավատքի մշակույթի կենտրոնի կառուցման համար տարածք է հատկացրել: Նա նաև ասաց, որ Դիարբեքիրը հարուստ պատմական անցյալով վայր է, որտեղ, ըստ էության, խաչվում են և’ մշակույթները, և’ կրոնները: Անցյալում այստեղ միասին ապրել են  շեմսիներ, սաբիներ, մուսուլմաններ, հրեաներ և քրիստոնյաներ:

Դեմիրբաշը նշեց, որ երբ նախագիծը կյանքի կոչվի, Դիրաբեքիրում զարկ է տրվելու և’ մշակութային զբոսաշրջությանը, և’ ուխտագնացությանը: Նա ասաց. «Աշխարհում մեծացել են կրոնների և քաղաքակրթությունների միջև բախումները: Սակայն մենք 3 տարբեր քաղաքակրթության և հավատքների խաչաձևման փողոցում, ըստ էության, հասարակական խաղաղություն ապահովելու վերաբերյալ ուղերձ ենք հղում: Այստեղ կա իսլամ, քրիստոնեություն և մովսիսականություն: Այստեղ կան հայ, թուրք, քուրդ, քելդանի ժողովուրդներ: Դիրաբեքիրի նման խաղաղ քաղաքից ուղերձ ենք հղում աշխարհին: Կրոններն ու ժողովուրդները խաղաղ ապրել են նույն փողոցում, այսինքն` նույն տեղում կա մզկիթ, անմիջապես մզկիթի ներքևում՝ երկու եկեղեցի, մի քիչ այն կողմ էլ՝ սինագոգ: Ցանկանում ենք այս գեղեցկությունը հասու դարձնենլ բոլորին, որ մարդիկ գան և տեսնեն: 1.5 կմ երկարություն ունեցող փողոցի կառույցների արտաքին ճակատը կառուցվել է պատմական շերտին համապատասխան: Ենթադրում եմ, որ Թուրքիայում չկա մեկ ուրիշ փողոց, որտեղ երեք տարբեր կրոնների տաճարներ լինեն: Ցանկանում ենք պատմել Դիարբեքիրի քաղաքակրթությունների համատեղ ապրելու մշակույթի մասին»:

Դեմիրբաշն ասաց, որ 110 հազար բնակչություն ունեցող Սուր գավառում դեռևս կանգուն են 162 հին տուն, 16 եկեղեցի, 28 մզկիթ, 32 աղբյուր, բազմաթիվ իջևանատներ ու բաղնիքներ: Հավելեց, որ նպատակ ունեն Դիարբեքիրը դարձնել թանգարան բաց երկնքի տակ:

firatnews.com
24.11.2010

«ANF» լրատվական գործակալություն