Բրիտանացի պատմաբան, Սուրբ Էնդրյուսի համալսարանում գրաբար դասավանդող Թիմ Գրինվուդին Ստամբուլի հնեաբանական թանգարանը թույլ չի տալիս ուսումնասիրել 6-ից 7-րդ դարերին վերաբերող հայկական երկու արծաթե խաչերը:
Խաչերի գոյության մասին պատմաբանը պատահաբար է իմացել: Ամեն ինչ սկսվել է էլեկտրոնային նամակից, հաղորդում է Ազատություն ռադիոկայանը:
Փետրվարին բրիտանացին նամակ է ստացել Հալեպից: Հեղինակը հայտնել է, որ ունի հայերեն գրությամբ հին արծաթե խաչ: Նա Հալեպի հոգեւորականներից մեկին խնդրել է թարգմանել գրությունը, իսկ Գրինվուդին խնդրել է ստուգել թարգմանությունը: Գրինվուդը նշում է, որ խաչերը տեսնելիս հասկացել է, թե որքան կարեւոր կարող են դրանք լինել հայ արվեստի պատմության համար:
Գիտնականը վստահ է, որ այդ խաչերը վերաբերում են 6-ից 7-րդ դարերին: Գրությունից հայտնի է միայն, որ խաչը պատրաստվել է Խոռխոռունյաց նահանգում ապրած ոմն Ներսեսի պատվերով:
Դրանից հետո Գրինվուդը նմանատիպ խաչեր է հայտնաբերել նաեւ Ստամբուլի հնագիտական թանգարանում, սակայն առայժմ չի կարողանում դրանք հետազոտելու թույլտվություն ստանալ թուրքերից:
Գիտնականը խաչերի մասին աշխատությունը մտադիր է հրապարակել 2011թ. գարնանը:
Leave a Reply