Հայրենակի’ց, քրդերե’ն էլ խոսիր

Թուղբա Թեքերեք

Դասընթացների ցուցակում ֆրանսերենի և տանգոյի կողքին արդեն տեղ են գտել նաև քրդերենն ու հայերենը:

Դասընթացների ցուցակում ֆրանսերենի և տանգոյի հետ մեկտեղ արդեն ընդգրկվել են նաև քրդերենն ու հայերենը: Ստամբուլում քրդերենի դասընթացներին մասնակցող ուսանողների պրոֆիլը ևս լուրջ փոփոխության է ենթարկվում: Քրդերեն և հայերեն դասընթացներ անցկացնող հաստատություններից Գեոակտիվ մշակույթի և ակտիվության կենտրոնն իրականում հիմնվել է 4 տարի առաջ: Այս կենտրոնը մասնագիտացել է հունական պարերի բնագավառում: Այս տարի մեկնարկած լեզուների դասընթացների մեջ քրդերենի և հայերենի կողքին տեղ են գտել նաև հունարենը, պարսկերենը, զազայերենը, լազերենը: Գեոակտիվ մշակույթի մասնագետ, քրդերեն ու զազայերեն դասավանդող Ջեմալ Աթիլան ասում է. «Թեև դարեր շարունակ կողք կողքի ենք ապրում, սակայն թե’ քաղաքականացված և թե’ ոչ քաղաքականացված մարդիկ հետաքրքրված չեն միմյանց մշակույթով»:

Աթիլան նշելով, թե ծանոթացման նպատակով իրենց օգտագործած արտահայտություններից մեկն էլ «Հայրենակի’ց, խոսի’ր քրդերեն»-ն է, ասում է. «Երկու ճապոնացի լրագրող հաճախել են իմ` քրդերենի դասերին, ապա գնացել և Բարզանիից հարցազրույց են վերցրել, բայց երբեք չեմ հանդիպել որևէ թուրք լրագրողի, ով քրդերեն սովորելու ցանկություն հայտնած լինի»: Աթիլան հայտնելով, թե բայց և այնպես` այս դասընթացների մեծ պահանջ կա, որը պայմանավորված է ոչ թե քաղաքական դրդապատճառներով, այլ՝ առօրյա կյանքի անհրաժեշտությամբ, նաև տալիս է հետևյալ ուշագրավ օրինակը. «Օրինակ` ես ունեմ մի կին ուսանող, որը կասկածում է իր ամուսնուն, և լեզուն սովորում է, որպեսզի հասկանա, թե ինչ է քրդերենով ասում ամուսինն իր ազգականներին»:

Հայոց լեզվի առաջին դասընթացը

Հոկտեմբերին երկրորդ դասաշրջանն սկսած Քումբարա արվեստի կենտրոնում լուսանկարչությունից մինչև իսպաներեն, տարբեր դասընթացների հետ մեկտեղ, ընդգրկվել են նաև քրդերենն ու հայերենը: Կենտրոնի գործադիր տնօրեն Ահմեդ Սայմադըն հայտնում է, որ քրդերենի դասընթացներին հաճախողների մի մասը գալիս է սեփական մայրենին սովորելու, իսկ մյուսը` համատեղ ապրելու մշակույթը յուրացնելու նպատակով: Քումբարա արվեստի կենտրոնում, որտեղ Թուրքիայում առաջին անգամ մեկնարկել են հայոց լեզվի դասընթացներ, հայերեն սովորողների մեջ կան նաև գիտնականներ, ովքեր ուսումնասիրություններ են կատարում հայկական պատմության կամ էլ մշակույթի վերաբերյալ:

«Թարաֆ» օրաթերթ

02.11.2010