Թուրքական իշխանությունները վաճառքի են հանել հայ մեծանուն բանաստեղծ Եղիշե Չարենցի՝ Կարսում գտնվող տունը։ Շրջանառվող լուրերի համաձայն՝ դեռ անցած տարի տունը գնելու ցանկություն է հայտնել մի պոլսահայ մեծահարուստ, սակայն անհայտ պատճառներով գործարքն այդպես էլ չի կայացել։
Ճշտելու համար, թե պոետի՝ Երեւանում գտնվող տուն-թանգարանում տեղյա՞կ են այս մասին, NEWS.am-ի թղթակիցը զրուցեց Եղիշե Չարենցի տուն-թանգարանի տնօրեն Լիլիթ Հակոբյանի հետ։
Վերջինս նշեց, որ թեպետ հարյուր տոկոսով չի կարող հաստատել լուրը, սակայն հատկանշական է, որ իրեն էլ նման խոսակցություններ հասել են։ «Թե որքանով է դա ճիշտ, չեմ կարող ասել։ Միայն մի բան գիտեմ, որ թուրքերն այդ տունը հաստատ չեն գնի։ Կարսի հայկական տները ավերված են, դրանցում բացառապես քրդեր են ապրում։ Թուրքերը երբեք չեն ուզի հայի տանն ապրել։ Միաժամանակ, ըստ իրենց օրենքի, տունը կարող են գնել միայն Թուրքիայի քաղաքացի հանդիսացող անձինք»,- նշեց Լիլիթ Հակոբյանը։
Հարցին, թե բանաստեղծի տունը գնելու խնդրանքով ինքը փորձե՞լ է, արդյոք, դիմել պոլսահայ համայնքի ներկայացուցիչներին, թանգարանի տնօրենն ասաց. «Նման փորձ չենք արել, որովհետեւ դա պետք է աներ Թուրքիայի հայ համայնքը, համայնքն առաջինը պետք է արձագանքեր նորությանը»։
Լիլիթ Հակոբյանը նաեւ տեղեկացրեց, որ 2005-ին, երբ ինքը Թուրքիայում էր, հանդիպել է Կարսի այն ժամանակվա՝ ազգությամբ քուրդ քաղաքապետի հետ, առաջարկել վերականգնել Չարենցի տունը՝ այն վերածելով մշակութային կենտրոնի։ «Առաջարկեցինք նաեւ տանը կից փոքրիկ հյուրանոցային համալիր կառուցել, որտեղ կանգ կառնեն աշխարհի տարբեր ծայրերից այդտեղ այցելող բոլոր հայ մտավորականները։ Կարսի նախկին քաղաքապետն այդ միտքը բավականին ջերմորեն ընդունեց։ Այս հարցով դիմեցի նաեւ Հայաստանի ԱԳՆ։ Հարցը պետական մակարդակով քննարկվում էր, սակայն գործընթացը կանգ առավ ճիշտ Հրանտ Դինքի սպանության օրը։ Այդ օրը ԱԳՆ-ն պետք է պատասխաներ ինձ՝ նամակով դիմե՞մ, թե՞ չդիմեմ թուրքական կողմին։ Եթե անգամ նամակ գրելու լինեի, պետք է ԱԳՆ-ն թելադրեր նամակի տեքստը, բայց ամեն ինչ այդպես էլ կիսատ մնաց»,- ամփոփեց Լիլիթ Հակոբյանը։
Նոյեմբեր 04, 2010
Leave a Reply