Human Rights Watch հեղինակավոր միջազգային իրավապաշտպան կազմակերպությունը, որի կենտրոնը տեղակայված է Նյու Յորքում, Մարդու իրավունքների եվրոպական դատարանի` Հրանտ Դինքի գործի առնչությամբ կայացրած վճռի մասին հայտարարությամբ հանդես գալով, կոչ արեց Թուրքիային «բացահայտել սպանության հետին պլանը»:
Վերոնշյալ կազմակերպության հրապարակած հայտարարության մեջ ասվում է. «Թուրք իրավասուները Մարդու իրավունքների եվրոպական դատարանի ընդունած որոշումից հետո պետք է կրկնապատկեն իրենց ջանքերը` Հրանտ Դինքի սպանության գործում բոլոր մեղքի բաժին ունեցողներին արդարադատության առաջ կանգնեցնելու հարցում»: Վերոհիշյալ կազմակերպության` Թուրքիայի հարցերով պատասխանատու Էմմա Սինքլեր Վեբը նշել է հետևյալը. «Եվրադատարանի որոշումը չպետք է վերջինը լինի Հրանտ Դինքի սպանությունը բացահայտելու և հանցագործներին դատապարտելու գործում: Հետաքննությունը վերսկսելը և ներկայում դատվողներից բացի մյուս հանցավորներին ևս դատական գործի մեջ ներգրավելը Թուրքիայի պարտականությունն է: Օրինական պարտավորությունները և արդարադատությունը պահանջում են հետաքննել պետության` այս հարցում ցուցաբերած անփութությունը և հավանական գաղտնի համաձայնությամբ եղած ծեծկռտուքը»:
Սինքլեր Վեբը, դրական գնահատելով այն հանգամանքը, որ Թուրքիան չի բողոքարկելու Մարդու իրավունքների եվրոպական դատարանի կայացրած որոշումը, նաև հետևյալը հայտնեց այդ կապակցությամբ. «Թուրքիայի առաջին արձագանքը վերոհիշյալ վճռին արդեն իսկ դրական զարգացում է: Եթե Անկարան իրոք լրջորեն է տրամադրված սույն որոշումն իրագործելու հարցում, ապա պետք է վերացնի խոսքի ազատության վրա դրված արգելքները»:
17.09.2010
«Միլլիյեթ» օրաթերթ
Leave a Reply