Պոլսո Հայոց Պատրիարքարանի բոլոր հոգեւորականները՝ պարիարքի փոխանորդ Արամ Աթեշյանի գլխավորությամբ, մեկնել են Վանի Աղթամար կղզի՝ նախապատրաստվելու երկու օրից Սուրբ Խաչ եկեղեցում տեղի ունենալիք պատարագին: Արամ սրբազանը Վան է մեկնել մոտ երկու ժամ առաջ:
Այս մասին NEWS.am-ից հայտնեցին Պատրիարքարանի մամլո ծառայությունից: Պատրիարք Մեսրոպ Մութաֆյանը, սակայն, չի մեկնել Վան: Նա թեեւ հիվանդանոցում բուժում անցնելուց հետո կրկին պատրիարքարան է վերադարձել, սակայն պատարագին չի մասնակցելու:
Հիշեցնենք, որ պատարագին, որը տեղի է ունենալու սեպտեմբերի 19-ին, Մայր Աթոռ Սուրբ Էջմիածինը, Մեծի Տանն Կիլիկիո կաթողիկոսությունը, ինչպես նաեւ Երուսաղեմի հայոց պատրիարքարանը չեն մասնակցելու:
Նշենք նաեւ, որ պատարագն ամենայն հավանականությամբ տեղի կունենա առանց եկեղեցու գմբեթին օծված խաչ տեղադրելու: Հենց այս հանգամանքի պատճառով է, որ Մայր Աթոռն ու Երուսաղեմի հայոց պատրիարքարանը առկախեցին իրենց մասնակցությունը պատարագին:
Սեպտեմբեր 17, 2010
Leave a Reply