Պետությունը կանխելու է Այա Սոֆիայում նախատեսվող պատարագը

Թուրքիայի Մշակույթի նախարար Գյունայը, մեկնաբանություններ տալով մի խումբ հույների` Այա Սոֆիայում պատարագ անելու նախաձեռնության կապակցությամբ, ասաց. «Եթե դիտումնավոր կերպով հասարակական կարգը խախտելու ուղղությամբ որոշակի ջանքեր լինեն, պետությունը միջոցներ կձեռնարկի դրանց դեմ»:

Իրենց որպես հունական արմատներով Ամերիկայի քաղաքացներ ներկայացնող 200 հոգանոց մի խումբ հաղորդել է, թե սեպտեմբերի 17-ին` ուրբաթ օրը, կրոնական արարողություն է անելու Այա Սոֆիա թանգարանում: Նրանց արշավախումբը, որի մուտքը Ստամբուլ նախատեսվում է Իփսալա սահմանադռնից, փորձելու է առանց տոմսերի մուտք գործել թանգարան և պատարագ անել այնտեղ:

Ստամբուլի Ֆեներ թաղամասում գտնվող Հունաց պատրիարքարանը թուրք պաշտոնյաներին հաղորդել է, թե ինքը որևէ առնչություն չունի տվյալ գործողության հետ:

Մշակույթի և զբոսաշրջության նախարար Էրթուղրուլ Գյունայը սույն հարցի առնչությամբ NTV հեռուստատեսությանը տված հարցազրույցում ասել է. «Եթե դիտումնավոր կերպով հասարակական կարգը խախտելու ուղղությամբ որոշակի ջանքեր լինեն, պետությունը միջոցներ կձեռնարկի դրանց դեմ»:

Գյունայը նաև հավելել է. «Ցավով պետք է շեշտել, որ տվյալ ֆանատիկ խմբի նախաձեռնությունը հրահրվում է դրսից: Մենք խորհրդանշական պատարագի միջոցներով ջանացինք մեր նպաստը բերել եղբայրությանն ու բարեկամությանը: Մեր մահմեդական որոշ քաղաքացիներ հանդես եկան Այա Սոֆիայում Բայրամի նամազ կատարելու պահանջով: Մենք էլ իրենց բացատրեցինք, որ Այա Սոֆիան 900 տարուց ավել սպասարկել է որպես եկեղեցի, մոտ 500 տարի էլ  որպես մզկիթ է ծառայել, և որ այն չպետք է լինի հավաքական կրոնական արարողությունների վայր: Մեր ընկերներն ըմբռնումով մոտեցան այս հարցին: Բայրամի նամազը կատարվեց Այա Սոֆիային մոտ գտնվող Սուլթան Ահմեդ մզկիթում:

Մեր աչքի լույսի պես ենք պահպանում

Եկրի ներսից եկող հարկադրանք չկա: Դրսից հրահրվող սույն նախաձեռնությամբ ձգտում են չեզոքացնել միջկրոնական երկխոսության նախաձեռնությունը: Այա Սոֆիայի պես առանձնահատուկ մի վայրում ցույց անելով, տհաճ միջադեպեր հրահրելով` ջանում են խաթարել այդ պատկերը: Հուսով ենք, որ ոչ ոք նման բան թույլ չի տա: Մենք Այա Սոֆիան մեր աչքի լույսի պես ենք պահպանում: 1500 տարվա պատմություն ունեցող պաշտամունքի այս վայրը մի ֆանատիկ խմբի կողմից նախաձեռնված հատուկ ցույցի համար օգտագործելը տեղին չէ: Բայրամի նամազ անելու պահանջն օրակարգից դուրս մղվեց` առանց զանգվածային ցույցի վերածվելու: Այս վերջին նախաձեռնության դեմ ջանքեր է գործադրում թե’ Հունաց պատրիարքարանը և թե’ Արտգործնախարարությունը: Մենք կարող ենք այդ վտանգը կանխել: Քանզի այս ցույցը կարող է այլ հանրահավաքների տեղիք տալ»:

NTV հեռուստատեսություն

16.09.2010