Քվեատուփից «այո» դուրս եկավ

Շաբաթներ շարունակ քաղաքական առաջնորդների` քաղաք առ քաղաք շրջելով` պարզաբանումներ տված, կողմ կամ դեմ քվեներ խնդրած սահմանադրական փաթեթի ընդունման հարցում վերջնական խոսքն ասել է թուրք ժողովուրդը:

52 միլիոնից ավել ընտրողների գրանցմամբ իրականացված հանրաքվեին են մասնակցել  38 միլիոն 369 հազար 253 ընտրողներ` 151 հազար 546 քվեատուփերում իրենց նախապատվությունը հայտնելով սահմանադրական փոփոխություններին:

Հեղաշրջման ժամանակ ընդունված սահմանադրության հետ առերեսվելու համար ընտրատեղամասեր այցելած թուրք ժողովրդի 58 տոկոսը կողմ է քվեարկել, իսկ 42 տոկոսը` դեմ:

Պատմական հանրաքվեում Թուրքիայի նահանգների մեջ առավել շատ կողմ ձայներ ստացվել են Աղրը նահանգից, որի ընտրողների 96 տոկոսը «այո» է ասել սահմանադրական փաթեթին: Աղրըին համապատասխանաբար հաջորդում են Բաթմանը, Սիիրթը և Բինգյոլը:

Սույն հանրաքվեում ամենամեծ հետաքրքրությամբ սպասում էին Դիարբեքիր նահանգի արդյունքներին: Այս նահանգում ընտրությանն է մասնակցել ընտրողների միայն 35 տոկոսը, որոնց մեջ կողմ քվեարկածները կազմել են 94 տոկոս: Իսկ ամենաշատ դեմ ձայներ են ստացվել Թունջելիից (Դերսիմ), որի ընտրողների 81 տոկոսը «ոչ» է ասել սահմանադրական փոփոխություններին: Թունջելիին այս առումով հետևում են Քըրքլարելին և Էդիրնեն (74 տոկոս): Հանրաքվեին ամենամեծ մասնակցությունն է ցուցաբերվել Բուրդուր նահանգում (89,30 տոկոս), իսկ ամենաքիչը մասնակցել են Հաքքարիում (9,05 տոկոս): Ընդհանուր առմամբ 62 նահանգ կողմ է քվեարկել, իսկ 19-ինը` դեմ:

 Ջիհան լրատվական գործակալություն

13.09.2010