Ռաքել Դինք. «Ջութակիս* նվեր եղավ իր ծննդյան օրը»

Հրանտ Դինքի այրին` Ռաքել Դինքը, արցունքն աչքերին մեկնաբանություններ անելով` նշեց, որ Մարդու իրավունքների եվրոպական դատարանի կայացրած որոշումը ծննդյան նվեր եղավ, և ասաց. «Եթե ողջ լիներ, հաստատ շատ երջանիկ կլիներ այս պահին, քանզի չէր ցանկանում հեռանալ իր երկրից»:  

Մարդու իրավունքների եվրոպական դատարանի կողմից Հրանտ Դինքի գործով Թուրքիային դատապարտող որոշում կայացվելուց հետո առաջին արձագանքը եկավ Դինքի ընտանիքից:

Հրանտ Դինքի այրի Ռաքել Դինքը հիշեցնելով, որ վաղը Հրանտ Դինքի ծննդյան օրն է, ասաց, որ սույն որոշումը այդ համատեքստում ծննդյան նվեր եղավ նրա համար: Ռաքել Դինը, մերթընդմերթ արցունքները զսպել չկարողանալով, հաղորդեց, որ փոխհատուցումը կիսվելու է երեք տարբեր կրթական հաստատությունների միջև:

Ռաքել Դինքը տեսախցիկների առաջ կանգնեց «Ակօս»-ի խմբագրատան առջև ու հանդես եկավ հետևյալ մեկնաբանությամբ. «Փորձեցին հասարակությանը հավատացնել, թե Դինքը եղել է թուրք հասարակության թշնամին, և ողջ եղած ժամանակ ջանացին իր սիրտը ամենից շատ դառնացնող այդ պիտակը կպցնել նրան:

2007 թ. հունվարի 23-ին տեղի ունեցած թաղման արարողության ժամանակ հարյուրհազարավոր մարդկանց` Դինքի առնչությամբ ցուցաբերած խղճի որոշման հրապարակումից հետո Մարդու իրավունքների եվրոպական դատարանի այսօրվա վճիռը դարձավ նրա իրավացիության առհավատչյան: Վաղը Ջութակիս ծննդյան օրն է. Մարդու իրավունքների եվրոպական դատարանի կողմից միաձայն ընդունված այս որոշումը ծննդյան նվեր եղավ նրա համար:

Ընտանիքիս անունից ուզում եմ հաղորդել, որ ողջ փոխհատուցումը, որպես նվիրատվություն, կիսվելու է երեք հաստատությունների միջև: Փոխհատուցման գումարը հանձնվելու է Հասարակական կամավորների հիմնադրամ Հրանտ Դինքի անվան կրթաթոշակի ֆոնդին, հայկական մշակույթի տարածմանը նպաստող Կենտրոնական հայկական վարժարանին, ինչպես նաև` Գեդիքփաշայի հայկական բողոքական եկեղեցուն, որպեսզի վերջինս աջակցի փախստականի կարգավիճակում Թուրքիայում գտնվող հայաստանցի երեխաների կրթության գործին:

Թույլ չտվեցին, որ Ջութակս տեսնի այս օրը, սակայն եթե ողջ լիներ, հաստատ շատ երջանիկ կլիներ այս պահին, որովհետև չէր ուզում հեռանալ իր երկրից: Բայց և այնպես, կասեր, թե տխրել է Թուրքիայի համար, քանի որ միշտ ցանկանում էր հպարտանալ իր երկրով:

Մենք ուզում ենք հավատալ, որ սույն որոշումից հետո շատ բան կփոխվի Թուրքիայի իրավական ու քաղաքական կյանքում: Հուսով ենք, որ թուրքական պետությունը, որը մինչ օրս խոսքի ազատությանը առնչվող կամ որևէ սպանության գործ հետաքննելիս չի կարողացել իր վրա ընկած պարտականությունն այնպես իրականացնել, որ կարողանար հպարտանալ դրանով, այսուհետ կհրաժարվի մեղավորին արդարացնելու և անմեղին դատապարտելու իր կեցվածքից ու առաջին քայլերը կանի` հասարակության խղճին արժանի պետություն դառնալու ճանապարհին»:

* Ջութակը կեղծանուն է, որ Հրանտ Դինքն օգտագործել է իր որոշ հոդվածներում:

http://www.radikal.com.tr

14/09/2010