Ոչ թե 200 կգ, այլ 100 կգ. Սուրբ խաչի խաչը տեղափոխվեց Աղթամար կղզի

Այսօր առավոտյան Վանի թանգարանից Աղթամար կղզի է տեղափոխվել Սուրբ խաչ եկեղեցու խաչը:

Թուրքական Milliyet-ի փոխանցմամբ` խաչի փոխադրումը տեղի է ունեցել Վանի փոխնահանգապետ Աթայ Ուսլուի ուղեկցությամբ:

Թուրքական լրատվամիջոցները նշում են նաև, որ խաչն ունի 100 կգ ծանրություն, 2,5 մ երկարություն և 130 սմ լայնություն: Սակայն մինչև այդ նշվում էր, որ Սուրբ խաչ եկեղեցու համար նախատեսված խաչը կշռում է 200 կգ:

Թե եկեղեցու տարածքի որ մասում կտեղադրվի խաչը, որոշելու են հայ հոգևորականները, որոնք կղզի կայցելեն երկու օր անց:

Հիշեցնենք, որ օրեր առաջ Վանի առևտրա-արդյունաբերական պալատի նախագահ Զահիր Քանդաշօղլուն հայտարարել էր, որ իրենք քայլեր են ձեռնարկելու Սուրբ խաչի գմբեթին հնարավորին շուտ խաչը տեղադրելու համար:

«Մեր առաջին նպատակը հայերի հետ լավ հարաբերություններ ստեղծելն է: Ցանկանում ենք, որ անվնաս շարունակվի հաշտեցման և երկխոսության գործընթացը: Այդ պատճառով մենք` Վանի գործարարներս, ստանձնել ենք խաչի տեղադրման գործը: Ինժեներների հետ խորհրդակցությունից հետո պարզ դարձավ, որ հնարավոր չէ կղզի տանել կռունկ և տեղադրել 200 կգ կշռող խաչը: Սակայն մենք դա կանենք բոլորովին այլ տեխնիկայով: Երկուշաբթի խաչը կբերենք կղզի և կսկսենք տեղադրման աշխատանքները: Ես դա երաշխավորում եմ մեր հայ հյուրերին: Մեր խոսքը խոսք է»,- ասել էր Քանդաշօղլուն:

Tert.am

14.09.10