Թուրքերը մեզ խաբեցին Արամ Սրբազանի միջոցով. թուրքագետ

Սեպտեմբերի 19-ին Աղթամարի Սուրբ խաչ եկեղեցում մատուցվելիք պատարագը թուրքական քարոզչամեքենայի կողմից հայերին ուղղված մարտահրավեր էր։ Նման դիտարկմամբ այսօրվա ասուլիսին հանդես եկավ թուրքագետ Ռուբեն Մելքոնյանը՝ նշելով, որ հայերը լուրջ չվերաբերվեցին այդ մարտահրավերին։ Արդյունքում, ըստ նրա, թուրքական քարոզչամեքենային հաջողվեց շուրջ երկու ամիս մեզ թելադրել իր օրակարգը։

Մելքոնյանի խոսքով՝ Թուրքիայի իշխանությունների քարոզչությունը բազմաշերտ է և մի քանի նպատակներ է հետապնդում։ Սակայն հայկական կողմը շատ մակերեսային քննարկումներ անցկացրեց. «Մեզանում քննարկվում էր գնալ-չգնալու հարցը, չխորացանք խնդրի մեջ»։

Թուրքական իշխանությունների այն պատճառաբանությունը, թե Սուրբ խաչի վրա խաչը չի տեղադրվի տեխնիկական պատճառներով, թուրքագետը ծաղր է համարում։ «Հսկայական թուրքական պետությունը չի՞ կարողանում 200 կգ-ոց խաչը տեղադրել։ Այս պատճառաբանությունը թուրքական իշխանությունների ամենաանհաջող և պարզունակ քայլն է»,- նշեց նա։

Իրականում, ըստ բանախոսի, կան մի շարք ավելի լուրջ պատճառներ, որոնք Թուրքիայի իշխանություններին ստիպում են խաչ չտեղադրել Սուրբ խաչի վրա։ Պատճառներից մեկն այն է, որ սեպտեմբերի 12-ին Թուրքիայում անցկացվելու է Սահմանադրության փոփոխությունների հանրաքվե։ Երկրի սահմանադրական փոփոխություններին դեմ են ընդդիմադիր ուժերը։ «Քանի որ թուրքական հասարակության մեջ հակաքրիստոնեական տրամադրություններ կան, խաչի տեղադրմամբ Թուրքիայի ղեկավարությունը ժողովրդի մոտ իր ռեյտինգը կիջեցներ»,- բացատրեց թուրքագետը։

Այն, որ Մայր Աթոռ Սուրբ Էջմիաջինը որոշել էր երկու հոգևորական ուղարկել Վան, թուրքագետը գրագետ և զուսպ որոշում է համարում։ Սակայն նա, միաժամանակ, նշեց, որ հայկական կողմը որոշում կայացնելու հարցում շտապեց՝ հաշվի չառնելով, որ թուրքերի բնավորության գծերից մեկն էլ խոստումներ տալն ու դրանցից հրաժարվելն է։

Մելքոնյանը նաև ընդգծեց, որ Պոլսո Հայոց արքեպիսկոպոսի ընդհանուր փոխանորդ Արամ Սրբազանի միջոցով թուրքերը ապակողմնորոշեցին և խաբեցին հայ ժողովրդին։

«Թուրքերն այսօր աշխարհին դեմոկրատի դիմակի ներքո են ներկայանում, սակայն շարունակում են գործել երիտթուրքերի հոգեբանությամբ»,- ընդգծեց նա։

Մելքոնյանին նաև մտահոգում է այն, որ Սուրբ խաչը դեռ եկեղեցու կարգավիճակ չի ստացել։ «Պոլսո հայոց պատրիարքարանը թող մտածի, որ գնալու է չօծված հուշարձան-թանգարանում պատարագ մատուցելու»։

06.09.10

Tert.am