Աղթամար կղզու Սուրբ Խաչ եկեղեցում անցկացվելիք պատարագը կարող է անորոշ ժամանակով հետաձգվել

Ահաբեկչական սպառնալիքի մեծացման պատճառով Աղթամար կղզու Սուրբ Խաչ եկեղեցում անցկացվելիք պատարագը կարող է անորոշ ժամանակով հետաձգվել: Ըստ ՙԵրկրամաս՚ թերթի ինտերնետային տարբերակի մի ընթերցողի տեղեկության, որ ստացվել է Վանից, թուրքական հատուկ ծառայությունները տեղեկություններ են ստացել այն մասին, որ թուրք­­-­ադրբեջանական ՙՀայերի անհիմն պնդումների դեմ պայքարի միություն՚ կազմակերպության կողմից նախապատրաստվում է սադրանք:

Ինչպես հայտնում է Ռուսաստանի հայերի ՙԵրկրամաս՚  թերթի Լրատվական կենտրոնը, թուրքական հատուկ ծառայություններին հատկապես անհանգստացրել է այն փաստը, որ ՙսադրանքի՚ կազմակերպմանը կարող են մասնակից լինել բանակի և ոստիկանության ներկայացուցիչներ, ովքեր համակրում են պատարագի անցկացման դեմ հադես եկող թուրք ազգայնամոլներին:

Նշենք, որ Սուրբ Խաչ եկեղեցում անցկացվելիք պատարագի դեմ բողոքի շարժումն օր օրի ուժեղանում է: Եկեղեցու գմբեթին խաչի տեղադրմանը դեմ հանդես եկող թուրք ազգայնամոլները կառավարությունից պահանջում են արգելել Հայաստանից և Սփյուռքից ուխտավորների մասնակցությունը պատարագին: Հակահայկական արշավին մասնակցում են ոչ միայն լուսանցքային կազմակերպություններ, այլև լուրջ քաղաքական ուժեր: Այս համատեքստում Սուրբ Խաչ եկեղեցու գմբեթին իբր տեխնիկական պատճառներով խաչ տեղադրելու անհնարինության մասին Թուրքական իշխանությունների հայտարարությունը կարող է  դիտվել որպես զիջում ազգայնամոլներին:

 http://www.yerkramas.org/2010/09/06/