«Խաչի» մասին քննարկումներ` պատարագից առաջ

Վանի Առևտրի և արդյունաբերության պալատի (VATSO) վարչական խորհրդի նախագահ Զահիր Քանդաշօղլուն, ճիշտ համարելով Հայաստանի այն մի խումբ հոգևորականներին, ովքեր եկեղեցու վրա խաչ չտեղադրվելու պատճառով չեն մասնակցելու պատարագին, ասաց. «Խոսք ենք տալիս, բայց չենք դնում. դա լինելու բան չէ»:

Այն հանգամանքը, որ Հայաստանի մի խումբ հոգևորականներ հայտարարել են, թե չեն մասնակցելու սեպտեմբերի 19-ին Աղթամարի եկեղեցում նախատեսվող պատարագին` խաչի չդրվելու պատճառաբանությամբ, հակազդեցության տեղիք տվեց: Վանի նահանգի Մշակույթի և զբոսաշրջության տնօրենի տեղակալ Սալիհ Թաթլըն բավարարվեց միայն ասելով, թե այդ հայտարարությունն արել է Հայաստանի պատրիարքարանը (ի նկատի ունի կաթողիկոսարանը), իսկ Վանի փոխնահանգապետ Աթա Ուսլուն նշեց, որ սույն խնդիրը ուղղակիորեն վերաբերվում է Մշակույթի և զբոսաշրջության նախարարությանը:

Իսկ Վանի Առևտրի և արդյունաբերության պալատի (VATSO) վարչական խորհրդի նախագահ Զահիր Քանդաշօղլուն, ճիշտ համարելով պատարագին չմասնակցող հոգևորականներին, ասաց. «Խոսք ենք տալիս, բայց չենք տեղադրում: Դա լինելու բան չէ, սխալ է: Ափսոս մեր աշխատանքը: Խաչը պետք է անպայման դրվի: Նման մանրուքի պատճառով այս հարցը չպետք է առկախվի: Մշակույթի և զբոսաշրջության նախարարը պետք է լուծի այս հարցը: Ես գրություն եմ հղելու նախարարին և քաղաքացիական-հասարակական կազմակերպություններին ու Վանի պատգամավորներին ժողովի եմ հրավիրելու` սույն խնդիրը քննարկելու համար: Այդ հարցը քննարկելու ենք»:   

Թուրքիայի ճանապարհորդական գործակալությունների միության (TÜRSAB) Վանի շրջանային գործադիր խորհրդի նախագահ Աբդուլլահ Թունչդեմիրը ևս հայտնելով, որ Հայաստանի հոգևորականների մի խումբ չի գալու պատարագին, ասաց նաև հետևյալը. «Մյուս հայերը գալիս են: Որևէ խնդիր չկա: Այդ հոգևորականների խմբի խնդիրը քննարկելու համար էլ ժողով է արվում»:

Վանի առևտրի բորսայի (VATBO) վարչական խորհրդի նախագահ Ֆերիդուն Ըրաքը նշելով, թե Թուրքիայի Հանրապետությունը կողմ է, որ տեղի փոքրամասնությունները պահպանեն իրենց մշակույթները, հայտնեց. «Մենք ի սրտե ցանկանում ենք մեր հարևան Հայաստանի հետ սահմանները բացել և տնտեսական հարաբերություններ սկսել: Մեր այս ցանկությունը արտահայտելով հանդերձ, մեր հնարավորության սահմաններում ջանքեր ենք գործադրում դրանք իրագործելու համար: Անշուշտ պետք է հաշվի առնել այնպիսի գործոններ, ինչպիսիք են միջազգային հարաբերությունները, ներքին ու արտաքին հավասարակշռությունը, ինչպես նաև` այլ երկրների հետ մեր ունեցած հարաբերությունները: Հայ քաղաքացիներն ու Հայաստանը պետք է նրբազգաց լինեն այդ հարցերի հանդեպ: Մաղթում ենք, որ այս կետում, որին հասել ենք, ծրագիրը շարունակվի, և ընդհանուր լեզու գտնենք»:

Նախատեսվող պատարագի վերջին պատրաստությունները տեսնելու համար անցած շաբաթ Վան այցելած և այստեղի նահանգապետ Մյունիր Քարալօղլուի հետ հանդիպում ունեցած Հայոց պատրիարքի Հոգևոր խորհրդի նախագահ, արքեպիսկոպոս Արամ Աթեշյանը նույնպես ասել էր հետևյալը. «Խաչը տեղադրվելու է, սակայն չգիտեմ, թե երբ: Մեզ խոսք են տվել: Խաչն անպայման տեղադրվելու է, որովհետև այդ մասին որոշում է ընդունվել: Սակայն տեխնիկական խնդրի պատճառով խաչի տեղադրումը թերևս կմնա պատարագից հետո»:

beyazgazete.com
06.09.2010