Իգդիրում իր գործունեությունն իրականացնող, այսպես կոչված, «Հայկական անհիմն պնդումների դեմ պայքարի միությունը», որը հովանավորվում է ադրբեջանա-թուրքական ազգայնականների կողմից, հերթական զավեշտալի ակցիան է պատրաստվում իրականացնել։
Հիշյալ կազմակերպության նախագահ Գյոքսել Գյուլբեյը նշել է, որ իրենք ցանկանում են Վանի ժողովրդին ներկայացնել «հայ դաշնակների իրական դեմքը» եւ հավելել, որ դրա համար իրենք ցանկացել են հենց Աղթամարի վերաբացման օրը՝ սեպտեմբերի 19-ին, Վանում հայերի կողմից կոտորված թուրքերի հիշատակի համար վրան տեղադրել, որը, սակայն, Վանի նահանգապետարանը մերժել է։
Ըստ Գյոքսելի՝ նահանգապետարանն իրենց թույլատրել է վրանը տեղադրել միայն սեպտեմբերի 4-ին։ «Մենք մամուլից տեղեկացանք, որ Վանի ժողովուրդը, Աղթամարի վերաբացմանը, իրենց տներում են հյուրընկալելու հայերին։ Բայց մենք ցանկանում ենք վանեցիներին ցույց տալ, թե ովքեր են հայերը», – նշել է Գյոքսել Գյուլբեյը՝ հավելելով, որ իրենք սեպտեմբերի 4-ին տեղադրելիք վրանում հայերի իրականացրածների վերաբերյալ գիրք, ամսագիր եւ խտասկավառակներ կբաժանեն։
Նշենք, որ այս կազմակերպության հակահայ ակցիաներին ակտիվ անդրադառնում են թուրքական լուրջ լրատվամիջոցները, չնայած որ նրա կազմակերպած հակահայ միջոցառումներին մասնակցում են շատ քիչ թվով մարդիկ։ Պատահական չէ, որ կազմակերպությունը գտնվում է Իգդիրում, որտեղ բնակչության կեսը ադրբեջանցիներ են։ Օրինակ՝ հիշյալ կազմակերպության կողմից Կարսում հայ-թուրքական սահմանի բացման դեմ կազմակերպած ակցիային 5 հոգի է մասնակցել։
Կարծում ենք, որ Վանում այս ռասիստական կազմակերպության անդամների անվտանգությունը թուրքական ոստիկանությունը կկարողանա պաշտպանել տեղացիներից, ովքեր ամեն ինչ անում են հայերին ըստ արժանավույն դիմավորելու եւ պատվելու համար։
Հիշեցնենք, որ մեկ ամիս առաջ Վանի նահանգի առեւտրաարդյունաբերական պալատի նախագահ Զահիր Քանդաշօղլուն խիստ քննադատության էր ենթարկել Կարսի նահանգապետ Ահմեդ Քարայի՝« Հայերն են մեզ կոտորել, ոչ թե մենք` նրանց» արտահայտությունը։ Զահիր Քանդաշօղլուն նշել էր. «Մենք` որպես Վանի առեւտրա-արդյունաբերական պալատի անդամներ, սխալ ենք համարում Կարսի նահանգապետ Ահմեդ Քարայի՝ «Հայերն են մեզ կոտորել, ոչ թե մենք` նրանց» արտահայտությունը, եւ սխալ ենք համարում նահանգապետի՝ նման քննարկումների մեջ մտնելը», – նշել է Քանդաշօղլուն՝ ավելացնելով, թե Կարսի նահանգապետը չէ, որ պատմաբանի առաքելություն պետք է իրականացնի։
Արթուր Հակոբյան
Սեպտեմբեր 02, 2010
Leave a Reply