Հնագիտական պեղումների արդյունքում ի հայտ եկավ «հանդուրժողականություն»

Վանի ամրոցի հետևում` հին քաղաքի կենտրոնում, կատարված հնագիտական պեղումների ժամանակ գտնվել են 1900-ական թթ. հայերի և մուսուլմանների կողմից համատեղ օգտագործված շինություններ:

Հին Վան քաղաքում պեղումնային աշխատանքները ղեկավարող «Յուզյունջույըլ» համալսարանի Ճարտարապետության ամբիոնի ասիստենտ-դասախոս, դոկտոր Շահաբեթթին Օզթուրքն ասաց, որ այս պեղումները մեծ կարևորություն ունեն շրջանի համար: Նշելով, որ 1915-ից մինչ օրս այդ գոտին մնացել է հողի տակ, Օզթուրքն ասաց. «Վերոնշյալ հատվածում 40 օր է, ինչ պեղումներ ենք իրականացնում: Շինության մեծ մասը պեղվել է: Հնարավորինս կարճ ժամանակահատվածում համապատասխան ծրագրեր են մշակվելու, և այս շինությունը դառնալու է Հյուսրև փաշա իսլամական համալսարանն ամբողջականացնող մասերից մեկը»:

Ասիստենտ-դասախոս, դոկտոր Օզթուրքը պատմելով, որ հին քաղաքը կազմված է եղել 13 թաղամասերից, նշեց հետևյալը. «Այն ժամանակ ամբողջ բնակչության թիվը 30 հազար էր, որի մի մասը կազմում էին հայերը, այսինքն` քրիստոնյաները, իսկ մյուս մասը` մուսուլմանական բնակչությունը: Սա մի քաղաք է, որտեղ իրոք հանդուրժողականություն է եղել: Անկասկած, այս բոլոր շինություններն օգտագործել են նաև տարբեր հավատքների պատկանող մարդիկ: Քայա Չելեբի մզկիթից 20 մ հեռավորության վրա գտնվող եկեղեցու կամ էլ համատեղ օգտագործված զույգ իջևանատների ի հայտ գալու փաստը մեզ համար ծառայում է այստեղի հանդուրժողականության շատ կարևոր ցուցանիշ»:

Ասիստենտ-դասախոս, դոկտոր Օզթուրքը տեղեկացնելով, որ կատարված պեղումների ժամանակ գտնվել են մուսուլմանների և հայերի համատեղ իջևանատներ, ասաց. «Երբ նայում ենք այն ժամանակաշրջանի պատմական աղբյուրներին, տեսնում ենք, որ որևէ խտրականություն չի եղել: Դա պարզ ձևով ցույց են տալիս նաև անցած տարիները, օտարազգի ճանապարհորդների կատարած գրառումները, նկարները»:

 Նա նաև շեշտեց, որ կատարվող պեղումներից հետո, հայտնաբերված կառույցները վերականգնվելով, ապահովելու են տուրիզմը և պաշտպանության տակ են առնվելու:

 radikal.com.tr
31.08.2010