Սերժ Թանգյանը Թուրքիա չի գնա, քանզի ուզում է երգելուց բացի նաև ճշմարտությունն ասել

Ամերիկահայ հայտնի ռոք երաժիշտ Սերժ Թանգյանը համերգ տալու հրավեր է ստացել Թուրքիայից։ Այս մասին երաժիշտն ասել է Աթենքի «Ազատ օր» թերթին տված հարցազրույցում։ Նա պատմել է, որ 1998թ. նույնպես հրավիրվել էր Թուրքիա՝ Slayer նվագախմբի հետ համերգային շրջագայության, բայց չի գնացել։

Երգչի խոսքով՝ իր համար դժվար է գնալ մի երկիր, որտեղ որպես արվեստագետ չես կարող ազատորեն իրականությունն ասել։ «Դա ինձ համար արվեստ չէ։ Ինձ համար բավարար չէ միայն երգելը։ Կերգեի Թուրքիայում, եթե կարողանայի երաժշտությանս զուգահեռ անկաշկանդ արտահայտել նաև գաղափարներս»,- ասել է նա։

Ներկայացնելով իր տպավորությունները օգոստոսի 12-ին Երևանում ունեցած համերգի մասին՝ երաժիշտն ասել է, որ համերգը շատ ոգևորիչ ու հետաքրքիր էր։ «Չնայած սկզբում փոքր-ինչ տեխնիկական բարդություններ եղան, վերջը շատ լավ էր։ Ինձ համար մանավանդ շատ հարուստ զգացում էր, քանի որ առաջին անգամ էի ելույթ ունենում հայրենիքում։ Ցեղասպանությանը նվիրված հայերեն մի երգ ունեմ իմ նոր ալբոմում։ Այդ երգի մեկնաբանումն ու արձագանքը հայրենիքում յուրահատուկ էր. չեմ կարծում, որ այլ վայրում կկարողանամ երգել ավելի լավ և ունենալ այդպիսի  վեհ ապրումներ, ինչպիսիք ունեցա հայրենի հողի վրա»։

Սերժ Թանգյանն այժմ զբաղվում է իր բանաստեղծությունների գրքի հրատարակությամբ և մյուզիքլի ստեղծմամբ։ Մյուզիքլը կոչվում է «Շղթայված Պրոմեթևս»։ Առաջին ցուցադրությունը նախատեսվում է 2011թ. մարտին Քեմբրիջի «Հարվարդ» համալսարանի հայտնի հանդիսասրահում։ Այս գործի ժամանակակից ներկայացումը պատկանում է հայտնի թատերագիր Սթիվըն Սեյթըրին։ Թանգյանն ասել է, որ ունի նաև այլ ծրագրեր, որոնց մասին հետո կխոսի։

Այն հարցին, թե ի՞նչ է Ցեղասպանությունը իր համար, երաժիշտն ասել է. «Ջնջում։ Իրականության ջնջում։ Անարդարության մեծագույն եղելությունն է։ Պատճառը, որ պետք է հաճախ խոսենք նրա մասին, այն է, որ կա միջազգային անտարբերություն դրա ճանաչման ու հատուցման առնչությամբ ՄԱԿ-ի կամ միջազգային այլ կառույցների կողմից»:

Tert.am

31.08.10