Չիչեքն ակնարկել է ՊԿԿ-ի հայ անդամների մասին

Թուրքիայի փոխվարչապետ Ջեմիլ Չիչեքը հայտնելով, թե հայկական ահաբեկչության վերացումից հետո այդ գործը հանձնվել է ՊԿԿ-ին, ասաց նաև հետևյալը. «Չթլպատված ահաբեկիչները շատ բան են արտահայտում»:

Թուրքիայի պետնախարար և փոխվարչապետ Ջեմի Չիչեքը պետնախարար Զաֆեր Չաղլայանի հետ մեկտեղ Կազմակերպված արդյունաբերական շրջանի /OSTİM/ ղեկավար շենքում հանդիպեց գործարարների հետ: Չիչեքն այստեղ ելույթ ունենալով` Հարավարևելյան Անատոլիայի նախագծի /GAP/ մասին խոսելիս նշեց, որ սույն նախագծի շնորհիվ աշխատանքով կարող է ապահովվել 3 միլիոն 800 հազար մարդ: Նա հիշեցրեց նաև ահաբեկչության դեմ պայքարի համար ծախսվող 300 միլիարդ դոլարի մասին:  

Չիչեքն ասաց նաև հետևյալը. «Հարավարևելյան Անատոլիայի 10 նախագիծ ֆինանսավորող գումարը ծախսվել ու ծախսվում է` հանուն այս երկրի միասնության ու բարօրության, ինչպես նաև` ամբողջականության պահպանման: Եթե դուք զարգանում եք, նշանակում է` սեղմում եք ոմանց ոտքը: Եթե այդ ոտքերը մեկից ավելին են, այսօր դրանց օգտագործած մահակի, գործիքի անունը, որը կիրառվում է մեր երկրի զարգացմանը խոչընդոտելու, խառնակչություններ և ներքին բախումներ հրահրելու համար, ահաբեկչություն է»:

Չիչեքը նշելով, թե Թուրքիան արդեն 40 տարուց ավելի պայքարում է ահաբեկչության դեմ, հայտնեց. «80-ականներից առաջ դա գաղափարախոսական ահաբեկչությունն էր, 80-ականներից հետո` աջակողմյան և ձախակողմյան ահաբեկչություն… Խոսքը ոչ միայն հայկական ահաբեկչության մասին է. հայկական ահաբեկչության ու ՊԿԿ-ի ահաբեկչության միջև գոյություն ունի սերտ համագործակցություն, նրանք արյան եղբայրներ են: Հայկական ահաբեկչության փուլից դուրս եկան. գործը հանձնեցին այս կողմին: Ներողություն եմ խնդրում արտահայտությանս համար, բայց այն հանգամանքը, որ ահաբեկիչների մի մասը թլպատված չէ, արդեն իսկ խոսուն փաստ է: Այսինքն` դրանք ընդամենը խոսակցություններ չեն: Մենք լավ գիտենք` ով ինչ է»:

radikal.com.tr
21.08.2010