Եվրոպական դատարանը Դինքի գործով մեղավոր է ճանաչել Թուրքիային

Մարդու իրավունքների եվրոպական դատարանը բավարարել է արևմտահայ լրագրող և «Ակօս» շաբաթաթերթի խմբագրապետ Հրանտ Դինքի ընտանիքի հայցը՝ վճռելով, որ այս գործով թուրքական պետությունը մեղավոր է երկու՝ ապրելու և խոսքի ազատության իրավունքները ոտնահարելու համար։ Այս մասին հաղորդում է թուրքական Hurriyet Daily News & Economic Review-ը։

Դատարանը, մասնավորապես, վճռել է, որ թուրքական ինքնությունը ենթադրաբար անարգելու համար Դինքին դատելով՝ Թուրքիան փաստացի ոտնահարել է խոսքի ազատության իրավունքը և պատշաճ միջոցներ ձեռք չի առել Դինքին պաշտպանելու համար՝ չնայած տեղյակ է եղել, որ Դինքը բազմաթիվ պառնալիքներ է ստացել։

Ըստ թուրքական «Վաթան» թերթի՝ դատարանը նաև դատապարտել է թուրքական պետությանը` Դինքի սպանության գործով հարուցված դատական գործընթացն անարդյունավետ կազմակերպելու համար։

Թեև Մարդու իրավունքների եվրոպական դատարանը որևէ հայտարարություն չի տարածել այս առնչությամբ, ակնկալվում է, որ պաշտոնապես վճիռը կհրապարակվի արդեն սեպտեմբերին։

Tert.am

23.08.10