Թուրքիայում ներքաղաքական պայքարի մեջ ազգային խտրականության շահարկումը և այլ էթնիկ ծագում ունեցողներին ազգայնամոլության թիրախ դարձնելը վաղուց ի վեր վերածվել է քաղաքական մշակույթի նորմի, որովհետև դրա համար ազգայնամոլությամբ թունավորված հասարակական լայն շերտերի մեջ կա պարարտ հող: Ահա դրա հերթական դրսևորումներից մեկը, որի մասին տեղեկանում ենք ԶԱՄԱՆ օրաթերթից:
ՙԱնկարայի քաղաքագլուխ Մելիհ Գյոքչեքն առաջ քաշեց այն տեսակետը, թե Հանրապետաժողովրդական կուսակցության գլխավոր նախագահ Քեմալ Քըլըչդարօղլուն ալևի է, իսկ մայրը` հայ: Գյոքչեքը պաշտպանեց այն գաղափարը, ըստ որի` Քըլըչդարօղլուն թաքցնում է դա և պարզ չի վերաբերվում:
«Առավոտն Անատոլիայում» հեռուստածրագրին հյուրընկալված Անկարայի քաղաքապետ Գյոքչեքը հայտնեց, որ Քըլըչդարօղլուի մայրը հայ է, և ինքը թաքցնում է նաև իր` ալևի լինելու հանգամանքը: Գյոքչեքը նշելով, թե անկախ որևէ մեկի արմատներից, եթե վերջինս Թուրքիայի Հանրապետության քաղաքացի է, ապա կարող է օգտվել բոլոր իրավունքներից, ասաց նաև հետևյալը. «Քըլըչդարօղլուն չի ժխտում, որ իր մայրը հայ է, իսկ Քըլըչդարօղլուն` ինքը, ալևի է: Նա, ով խտրականություն է դնում ալևիների և սուննիների միջև, հայրենիքի դավաճան է»:
Գյոքչեքը շեշտելով, թե Հանրապետաժողովրդական կուսակցության առաջնորդ Քըլըչդարօղլուն իր հանրահավաքներն անում է այն գավառներում, որոնք հոծ բնակեցված են ալևիներով, նաև հետևյալն ասաց այդ կապակցությամբ. «Ալևի քաղաքացիներն այդ կերպ շահագործվում են: Քաղաքապետարանի ընտրությունների ժամանակ էլ հայկական համայնք է գնում, իր ինքնության մասին հայտնելով` նրանցից օգնություն խնդրում: Դա իր իրավունքն է, սակայն այդ բոլորն անում է առանց աղմուկի: Երբ իրեն հարցնում են այդ մասին, անմիջապես սկսում է խուսափողական պատասխաններ տալ: Թաքցնում է իր ալևի լինելը, աշխատում է գաղտնի պահել նաև իր մոր` էթնիկապես հայ լինելու հանգամանքը: Հստակ չի արտահայտվում: Ալևի լինելն ամոթալի բան չէ: Կոսովոցի է: Դա թաքցնելու, դրանից վախենալու կարիք չկա: Դեմոկրատական երկրներում մարդ պետք է ասի իր ինքնության մասին»:
Ջիհան գործակալություն
zaman.com.tr
13.08.2010
Leave a Reply