Մարկ Գերագոս. Թուրքիան պետք է վերջ տա ջայլամի քաղաքականությանը

Թուրքիան գլուխն ավազի մեջ թաքցնելու փոխարեն պետք է ընդունի պատմական իրողությունը: Այս մասին Los Angeles Times թերթին տված հարցազրույցում ասել է ամերիկահայ փաստաբան Մարկ Գերագոսը, որը Թուրքիայի կառավարության և երկրի երկու խոշոր բանկերի` Կենտրոնական բանկի և Գյուղատնտեսական բանկի դեմ ամերիկահայերի ներկայացրած հայցը պաշտպանող չորս փաստաբաններից մեկն է:

«Հուսով ենք, այս հայցը բեկումնային կլինի թուրքերի համար պատմական իրողությունները ճիշտ ընկալելու տեսանկյունից: Թուրքերն իրենց գլուխներն ավազում թաղելու փոխարեն պետք է աշխատեն փոխհատուցել իրենց արածների համար: Պատմական իրողությունը ժխտելու և լոբբիստական գործունեության համար ահռելի գումարներ վատնելու փոխարեն պետք է ընդունեն այն և թողնեն անցյալում»,- հայտարարել է Գերագոսը։

«Մեր ձեռքում հայտնվել են բոլորովին նոր փաստաթղթեր և տեղեկություններ: Ելնելով ռազմավարական պատճառներից` դրանք ներկա պահին չեմ բացահայտի, սակայն 180 օրվա ընթացքում դրանց մասին կիմանաք»,- ասել է Գերագոսը:

Իր հերթին թուրքական մամուլը տեղեկացնում է, որ «Երեք ալիք» կոչվող ծրագրի շրջանակում Թուրքիան սկսել է փաստաթղթեր ու ապացույցներ հավաքել՝ ամերիկահայերի կողմից Լոս Անջելեսի դատարան ներկայացված գործում պաշտպանվելու համար:

Մասնավորապես, թուրքական Hurriyet օրաթերթը գրում է, որ ներկա պահին պաշտպանվելու համար Անկարան ուսումնասիրում է.

1. Ըստ ամերիկյան օրենքների, արդյո՞ք հնարավոր է հայց ներկայացնել դաշնային դատարաններում մեկ այլ երկրի դեմ,
2. Թուրքիայի կողմից նման հայցի ընդունման-չընդունման հավանականությունը,
3. Համապատասխան միջազգային պայմանագրերը:

Tert.am

12.08.10