Թունջելիի (Դերսիմ) հանրապետական գլխավոր դատախազությունը Դիարբեքիրի քաղաքապետ, Խաղաղություն և ժողովրդավարություն կուսակցության անդամ Օսման Բայդեմիրի դեմ հետաքննություն սկսեց` «դրոշի և ինքնավարության» մասին ելույթի պատճառով:
Թունջելիի հանրապետական գլխավոր դատախազությունը հետաքննություն սկսեց Թունջելիում կազմակերպված «Մունզուրի (Մնձուր) մշակույթի և բնության փառատոնի» շրջանակներում «Հասցեատիրոջ խնդիրը քրդական հարցում և ժողովրդավարական ինքնավարություն» թեմայով քննարկման ժամանակ ելույթ ունեցած քաղաքապետ Օսման Բայդեմիրի դեմ: Հետաքննության շրջանակներում Թունջելիի անվտանգության տնօրինությունից պահանջեցին Բայդեմիրի ելույթի տեսագրությունը: Անվտանգության տնօրինությունը տեսագրությունը եզրակացության հետ ուղարկեց դատախազություն:
Իսկ ի՞նչ էր ասել
Դիարբեքիրի քաղաքապետ Օսման Բայդեմիրը հետևյալ ելույթով էր հանդես եկել Թունջելիում կազմակերպված «Մունզուրի (Մնձուրի) մշակույթի և բնության փառատոնի» շրջանակներում կայացած քննարկման ժամանակ. «Արդարություն և զարգացում կուսակցությունը հայտարարում է «ազգային միության և միասնության» նախաձեռնության մասին: Ազգային միության և միասնության նախագծի մի առաջարկ էլ մենք ենք ուզում ներկայացնել: Հետևաբար` «ժողովրդավարական ինքնավարությունը», այո’, միության և միասնության նախագիծ է: Թե’ անջատման, թե’ արցունքների, թե’ ընդհարումների հակաթույնը 21-րդ դարում ժողովրդավարական ինքնավարությունն է: Ժողովրդավարական ինքնավարության տակ մեր կուսակցությունը չի ենթադրում Եվրոպայի` տեղական ինքնակառավարման մարմիններ ստեղծելու պայմանը: Եվրոպայի «տեղական ինքնակառավարական մարմինների պայմանը» այլ բան է, իսկ «ժողովրդավարական ինքնավարությունը»` լրիվ ուրիշ բան: Դա պետք է կանխավ ընդգծել: Գուցե ինձ կարող են սխալ հասկանալ կամ սխալ մեկնաբանել իմ ասածը: Սակայն ես հետևյալն եմ ընթերցում և ընկալում դրա տակ. խոսքը ժողովրդավար, բարօր մի Թուրքիա ստեղծելու նախագծի մասին է, ժողովրդավարական Թուրքիա, որն իրենից դուրս չի համարում, չի ճնշում, ինքնավար է հռչակում և միևնույն ժամանակ եկամտի բաշխման առումով արդարություն ապահովում բոլոր էթնիկ ինքնություններին, դավանանքներին և աշխատավորներին: Լա’վ, իսկ ինչպե՞ս կարելի է ստեղծել այդ ժողովրդավար ու բարօր Թուրքիան: Լինելու է «Արևելասևծովյան ինքնավար ռեգիոն», «Միջինսևծովյան ինքնավար ռեգիոն», միաժամանակ «ժողովրդավարական Թուրքիան» լինելու է «Ինքնավար Քուրդիստան»: Կարող է որևէ մեկը վեր կենա և ասի, թե «Դու սխալ ես հասկացել այս խնդիրը»: Սակայն ես հենց այդպես եմ ընկալում: Այդպես էլ մեկնաբանում եմ: «Ժողովրդավարական ինքնավարության նախագծում» կա Թուրքիայի Ազգային մեծ ժողովը, այն հաստատապես շարունակելու է գոյություն ունենալ: Մենք երբեք չենք առարկում դրա դեմ: Թուրքիայի Ազգային մեծ ժողովը շարունակելու է գոյություն ունենալ, Անկախության քայլերգը շարունակելու է լինել Թուրքիայի օրհներգը: Ես բոլորովին չեմ առարկում դրա դեմ: Թուրքական դրոշը շարունակելու է ծածանվել Թուրքիայում, դրա դեմ էլ առարկություն չունեմ: Սակայն, դրա հետ մեկտեղ, ամեն շրջանում գործելու է շրջանային խորհրդարան: Այդ շրջանային խորհրդարաններից մեկն էլ լինելու է Քուրդիստանի շրջանային խորհրդարանը: Թուրքական դրոշի կողքին, Թուրքիայի դրոշի կողքին, իմ պապերի, բոլորիս պապերի քրտինքով ձեռք բերված և այս պահին ծածանվող դրոշի կողքին, անշուշտ, երկնակամարում է լինելու նաև քուրդ ժողովրդի տեղական գույներով դրոշը: Ի՞նչ կլինի, որ մեր քաղաքապետարանի շենքի առաջ լուսին և աստղ կրող թուրքական դրոշի հետ մեկտեղ ծածանվի նաև դեղին-կարմիր-կանաչով մեր դրոշը»:
02.08.10 11:50
Leave a Reply