Հայ դաշնակահար Արծրունին համերգ է տալու Վանում

Ծնունդով պոլսեցի, հայկական արմատներ և համաշխարհային ճանաչում ունեցող դաշնակահար Շահան Արծրունին Աղթամար կղզում գտնվող հայկական եկեղեցում նախատեսվող պատարագի կապակցությամբ համերգ է տալու Վանում:

Անցած ամիսներին Նյու Յորքում Թուրքիայի գլխավոր հյուպատոսարանում հանդիպում ունեցած Արծրունին հայտնեց Աղթամար կղզում գտնվող հայկական եկեղեցում 2010 թ. սեպտեմբերի 19-ին կայանալիք պատարագի առիթով համերգ տալու իր ցանկության մասին: Արտաքին գործերի նախարարությունն էլ, Վանի նահանգապետարանի և ՙ100-րդ տարի՚ համալսարանի հետ կապի մեջ մտնելով, ապահովեց նրանց աջակցությունը տվյալ համերգին: Սեպտեմբերի 18-ին Վանի ՙ100-րդ տարի՚ համալսարանում նախատեսվող այդ միջոցառմանն ուղղված աշխատանքները հասել են վերջին փուլին: Արտգործնախարարությունը համերգը կազմակերպելու համար համագործակցում է նաև Հայոց պատրիարքարանի հետ:

Արծրունին  ՙ100-րդ տարի՚ համալսարանում նախատեսվող համերգում ներկայացնելու է թուրք ու հայ երգահանների, մասնավորապես` Յուքսել Քոփթագելի, Ֆերիդ Ալնարի, Ադնան Սայգունի, Կոմիտասի, Հովհաննես Սրվանձտյանի ստեղծագործությունները, որոնք ուղղված կլինեն նաև տեղացիներին: Համերգի շրջանակներում, որին մասնակցելու են նաև պոլսահայ բարիտոն Գևորգ Դավթյանը և ջութակահար Սևիլ Ուլուջանը, ներկայացվելու են նաև 2008 թ. վախճանված, համաշխարհային ճանաչում ունեցող պոլսահայ կոմպոզիտոր Սիրվարդ Քարամանուկի ստեղծագործությունները և «Աղթամար» վերնագրով երաժշտական ֆիլմի ցուցադրությունը, որի պրոդյուսերն է հենց ինքը` Արծրունին:

Շահան Արծրունին, որը նշեց, թե ինքը հոգեկան կապերով կապված է Աղթամարի եկեղեցու հետ, քանի որ իր ընտանիքի անցյալն առնչվում է Աղթամարին, միջազգային ճանաչում ունեցող դաշնակահար է, էթնոերաժշտագետ և երգահան: Արծրունին 2003 թ. Հայաստանի Մշակույթի նախարարության երաժշտական ներկայացուցիչ էր նշանակվել սփյուռքում: Ստամբուլի նահանգային կոնսերվատորիայի և ապա` ԱՄՆ-ի առաջատար երաժշտական դպրոցներից մեկի՝ Ջուլիարդ դպրոցի շրջանավարտ Արծրունին իր դոկտորական ուսումն էլ ստացել է Նյու Յորքի համալսարանում և համերգներ է տվել բազմաթիվ վայրերում` ներառյալ Սպիտակ տունը: Արծրունին սիմպոզիումներ է կազմակերպել բազմաթիվ համալսարաններում, հիմնականում` Հարվարդի, Կոլումբիայի և Միչիգանի համալսարաններում:

29.07.2010

http://www.dikkathaber.com/haber/20100729/ermeni-piyanist-arzruni-van-da-konser-verecek.html