Ստամբուլի 9-րդ վարչական դատարանը մերժել է Հրանտ Դինքի հիմնադրամի հայցը՝ չեղյալ համարել հակահայկական «Սարը գելին. Հայկական հարցի ներքին կողմը» վավերագրական ֆիլմի ցուցադրումը Թուրքիայի դպրոցներում։
Թուրքական Milliyet-ի փոխանցմամբ՝ Ստամբուլի 9-րդ վարչական դատարանն իր մերժումը հիմնավորել է նրանով, որ Թուրքիայի զինված ուժերի գլխավոր շտաբի կողմից պատրաստված հակահայկական 6 մասից բաղկացած ֆիլմի ցուցադրությունը դպրոցներում պարտադրված գործընթաց չէ, եւ թույլատրել է ֆիլմի հետագա ցուցադրումը։
Հրանտ Դինքի հիմնադրամի դատապաշտպաններից Ֆեթհիյե Չեթինը առարկել է՝ ասելով, թե Ստամբուլի ազգային կրթության նահանգային վարչությունը ֆիլմը ուղարկել էր բոլոր դպրոցներ՝ հրահանգելով ցուցադրել այն բոլոր աշակերտներին։ Ֆեթհիյե Չեթինը նշել է, որ միակողմանի պնդումների հիման վրա նկարված ֆիլմի ցուցադրումը երեխաների մոտ ծնում է թշնամություն հայերի հանդեպ եւ փչացնում երեխաների մտավոր առողջ դատողությունը, նպաստում հոգեկան սխալ զարգացմանը:
Ֆեթհիյե Չեթինը հիշեցրել է, թե ֆիլմում կան դրվագներ, որոնք դպրոցականների հոգեկան աշխարհի վրա բացասական ազդեցություն են թողնելու՝ նշելով ֆիլմում առկա դիակների, կտրված գլուխների տեսարանները, ինչպես նաեւ, իբր Հայաստանի դպրոցներում մի երդման արարողություն, որի ընթացքում հայ աշակերտները երդվում են վրեժխնդիր լինել թուրքերից։
Հրանտ Դինքի հիմնադրամը վճռական է եւ դատարանի որոշումը բողոքարկելու է։
Նշենք, որ «Սարը գելին. Հայկական հարցի ներքին կողմը» ֆիլմը ցուցադրվել էր թուրքական դպրոցներում, սակայն հասարակական բողոքի արդյունքում դրա ցուցադրումը ժամանակավորապես կասեցվել է։ Թուրք ծնողները բողոքում էին, թե իրենց երեխաները ֆիլմի ազդեցության տակ արտասվում էին եւ ծնողներից հարցնում. «Մեզ հայերը կոտորե՞լ են»:
Հուլիս 21, 2010
Leave a Reply