Ազգային կրթության նախարարությունից ստացված տեղեկության համաձայն` հայկական դպրոցներում ուսանում են հայկական ծագմամբ թուրք քաղաքացի երեխաները

Իգդիրի՝ Անհիմն հայկական պնդումների դեմ պայքարի կազմակերպության (ASİMDER) նախագահ Գյոքսել Գյուլբեյը հաղորդեց, որ Ազգային կրթության նախարարությունից պատասխան է ստացվել իրենց կազմակերպության ուղարկած այն նամակին, որը տեղեկություններ էր խնդրել հայկական դպրոցներում տրվող կրթության վերաբերյալ:

Գյուլբեյը թեմայի առնչությամբ տված իր գրավոր մեկնաբանության մեջ հայտնեց, որ հունիսի 29-ին ինքը նամակ է հղել Ազգային կրթության նախարար Նիմեթ Չուբուքչուին, որպեսզի տեղեկանա, թե ովքեր են կրթություն ստանում հայկական դպրոցներում, և ինչպիսի կրթություն է տրվում այնտեղ:

Գյուլբեյը նշելով, թե իրեն նամակ են ուղարկել Մասնավոր կրթական հաստատությունների գլխավոր տնօրեն Մեհմեդ Քյուչյուքի և Ազգային կրթության նախարարի խորհրդական Յուսուֆ Բյույուքի ստորագրությամբ, արձանագրեց, որ նամակով հայտնել են, թե հայկական դպրոցներում սովորում են հայկական արմատներով  թուրք քաղաքացի երեխաները:

Գյուլբեյը հայտնեց նաև, որ իրեն հաղորդվել է, թե 5580 թվակիր Մասնավոր կրթական հաստատությունների մասին օրենքի 5-րդ հոդվածի այն դրույթի համաձայն, ըստ որի` «այդ դպրոցներում կարող են կրթվել միայն տվյալ փոքրամասնությանը պատկանող Թուրքիայի Հանրապետության քաղաքացի երեխաները», և որ վերոնշյալ դպրոցներում գրանցվում են միայն Թուրքիայի Հանրապետության քաղաքացի եղող հայ երեխաները:

Գյուլբեյը նշեց նաև, որ նամակում տեղ է տրվել հետևյալ տեղեկություններին. «Հայկական դպրոցների տարրական ու միջին դասարաններում օգտագործվող դասագրքերը հաստատվում են մեր նախարարության կողմից: 22 հայկական մասնավոր դպրոցներից միայն Քարագյոզյան հայկական տարրական դպրոցն ունի գիշերօթիկ բաժին: Ըստ 6581 թվակիր օրենքի` հայկական դպրոցներում թուրքերենի և թուրքական մշակույթի դասերը ուսուցանում են պաշտոնական դպրոցներում աշխատող ուսուցիչների կողմից հանձնարարական ստացած դասատուները: Այդ ուսուցիչներից մեկը դպրոցում աշխատում է որպես տնօրենի գլխավոր տեղակալ: Մեր նախարարության հսկողության տակ գտնվող հայկական դպրոցները ևս մյուս դպրոցների նման վերահսկվում են մեր տեսուչների կողմից: Ինչպես որ նշված է օրենքի առաջին հոդվածում, այդ դպրոցներում սովորում են միայն Թուրքիայի Հանրապետության քաղաքացի հայ երեխաները: Մեր նախարարությանը որևէ տեղեկություն չի հասել առ այն, թե տվյալ դպրոցներում քարոզչություն է արվում աշակերտներին»:

zaman.com.tr
21.07.2010