Թուրքիայում իսլամական տրամադրությունների տեսանելի աճ կա. Ռուբեն Սաֆրաստյան

«Վերջին 2–3 տարում Թուրքիայում կա իսլամական տրամադրությունների բավական տեսանելի աճ՝ հասարակական մակարդակով։ Թուրքիայում նկատվում է այլ կրոնների, մասնավորապես քրիստոնեության և հուդայիզմի նկատմամբ բացասական վերաբերմունքի ակնառու ուժեղացում։ Եվ երրորդը, մենք տեսնում ենք, որ Թուրքիայի ներկայիս իշխանությունները, որոնք իսլամամետ են, իրենք իրենց գործունեությամբ նպաստում են այդ երևույթներին»,– այսօրվա ասուլիսին հայտարարեց ԳԱԱ Արևելագիտության ինստիտուտի տնօրեն, թուրքագետ Ռուբեն Սաֆրաստյանը՝ անդրադառնալով Թուրքիայում բռնի իսլամացման մասին լուրերին։

Ըստ նրա՝ վերը նկարագրված մթնոլորտից են բխում հայերի բռնի կրոնափոխության դեպքերը, ինչպես նաև վերջին տարիներին Թուրքիայում քրիստոնյա հոգևորականների սպանությունները։ «Հեշտ չէ Թուրքիայում հայ լինել և հայ մնալ»,– Հրանտ Դինքի խոսքերը հիշեցրեց Ռուբեն Սաֆրաստյանը՝ ընդգծելով, որ նման մթնոլորտի պատճառով Թուրքիայից հայերն արտագաղթում են, հայերենին տիրապետող երիտասարդների թիվը նվազում է։

«Երբեք չի կարելի համոզված լինել, որ Թուրքիայում չեն կրկնվի 55թ. դեպքերը»,– հայտարարեց Ռուբեն Սաֆրաստյանը՝ հիշեցնելով այդ տարի Թուրքիայում դիվանագետների աչքի առջև տասնյակ հայերի և հույների սպանությունները։ «Ստամբուլի հայ համայնքը պատանդ է Թուրքիայի իշխանության ձեռքին»,- ասաց նա։

Պոլսո հայոց պատրիարքի տեղապահի՝ մեծ աղմուկ բարձրացրած ընտրության առնչությամբ Սաֆրաստյանը նշեց, որ եթե թուրքական իշխանությունները չցանկանային, որևէ մեկը չէր ընտրվի։

Թուրքագետն անդրադարձավ նաև ԱՄՆ պետքարտուղար Հիլարի Քլինթոնի հայաստանյան այցին՝ նշելով, որ նրա այցը Ծիծեռնակաբերդ թեև հայերիս համար գոհացուցիչ չէ, սակայն այն մեսիջ էր Թուրքիային այն մասին, որ ԱՄՆ-ը կարող է ճանաչել Հայոց ցեղասպանությունը, եթե Թուրքիան ինչ–ինչ հարցերում զիջումների չգնա։

Tert.am, 08.07.10