Հրանտ Դինքի անվան միջազգային հիմնադրամը մի ցուցահանդեսի և գրքի նախագծով ներկայացնելու է Ստամբուլի հայ ճարտարապետներին:
Հրանտ Դինքի անվան միջազգային հիմնադրամը և Բարեգործությունը խրախուսող ճարտարապետների ու ինժեներների համերաշխության կազմակերպությունը (HAYCAR) ցուցահանդեսի և գրքի մի համատեղ ծրագրով ներկայացնելու են Ստամբուլի հայ ճարտարապետներին:
Ըստ վերոնշյալ հիմնադրամից ստացված տեղեկության` ՙՍտամբուլը 2010 թ. եվրոպական մշակույթի մայրաքաղաք՚ միջոցառումների շրջանակներում նոյեմբերին նախատեսվող «Ստամբուլի հայ ճարտարապետները և նրանց նպաստը Ստամբուլի ճարտարապետության մեջ» թեմայով նախագծի միջոցով ներկայացվելու են այն անմոռաց հայ ճարտարապետները, ովքեր դեր են խաղացել Ստամբուլի ձևավորման մեջ: Ծրագրի համակարգողն է լինելու ճարտարապետ Հասան Քուրույազըջըն:
Բալյան ընտանիքի կառուցած Դոլմաբահչե պալատը Ստամբուլում (19-րդ դար)
Ծրագրում տեղ են գտնելու 19-րդ դարի վերջին և 20-րդ դարի սկզբին Ստամբուլում ապրած և ստեղծագործած հայ ճարտարապետների կենսագրությունները, նրանց հեղինակած կառույցների մասին պատմական ակնարկներ, ճարտարապետական գծագրերը և տվյալ շինությունների նախկին տեսքերի վերաբերյալ նյութեր:
Քուրույազըջըն շրջել է Ստամբուլի Քուրթուլուշ, Փանգալթը, Թաքսիմ, Ջիհանգիր, Թարլաբաշը, Թյունել, Գալաթա, Էմինօնյու և Մահմութփաշա թաղամասերում և կազմել այն հայ ճարտարապետների անվանացուցակը, որոնց անունները ցուցահանդեսի և առանձին գրքի միջոցով ներկայացվելու են հասարակայնությանը:
Հրանտ Դինքի անվան միջազգային հիմնադրամից ստացված հայտարարության մեջ տեղ են գտել նաև Քուրույազըջըի մեկնաբանությունները, որը նշել է, թե Ստամբուլում են գտնվում 19-րդ դարից մնացած բազմաթիվ շենքեր, որոնց մեծ մասն այրվել է կամ քանդվել, սակայն կան նաև այնպիսի կառույցներ, որոնք կանգուն են մնացել:
Քուրույազըջըն հայտնեց նաև, թե ինքը որոշել է ուսումնասիրություն կատարել, որպեսզի գտնի այդչափ մեծ քանակությամբ շենքերի հեղինակներին:
05.07.2010
Leave a Reply