Ա’խ դու…

«Վաքիթ» օրաթերթի երեկվա համարի առաջին էջում տեղ գտած լուրի մեջ նշվում է հետևյալը. «Վաքիթի ձեռք բերած տեղեկությունների համաձայն` հաստատվել է, որ գլխավորապես Առաջին բանակի հրամանատար Հասան Ըղսըզի, ինչպես նաև` բանակի զորացրված հրամանատար Չեթին Դողանի և ռազմածովային ուժերի ծրագրերի բաժնի նախագահ, փոխծովակալ Ռամազան Ջեմ Գյուրդենիզի փեսաները հրեա են: Ենթադրվում է, թե հրեական ծագում ունի նաև Էրջան Ջայմազի ընտանիքը, որի որդու հետ ամուսնացել է գլխավոր շտաբի նախկին պետ Յաշար Բյույուքանըթի դուստրը` Բենգյուն»:

«Ռազմածովային ուժերի ծրագրերի բաժնի նախագահ, փոխծովակալ Ռամազան Ջեմ Գյուրդենիզի դուստրը` Ուլքեմ Գյուրդենիզ Սունթայը, ամուսնացած է Մեսութ Ջան Սունթայի հետ… Իսկ վերջինիս մայրը` Իվնա Սունթայը, արմատներով հայ քրիստոնյա է»:

Ես չգիտեմ` վերոհիշյալ անձինք իրո՞ք հրեա և քրիստոնյա են, թե՞ ոչ: Իրականում չեմ ճանաչում նաև լուրի հեղինակներին, որոնք սույն տեղեկությունը թողել են  որևէ թերթին ոչ սազական բամբասանքի մակարդակի` ասելով, թե «ենթադրվում է, որ նրա ընտանիքը հրեական ծագում ունի»:

Մի կողմ թողնենք այն, եթե անգամ այդ տեղեկությունը ճիշտ է: Այդ լուրն ամոթալի է հրեա և քրիստոնյա ծագմամբ փեսաների՞ համար, թե՞ այն մտայնության, որը հանցագործություն է համարում հրեականությունն ու քրիստոնեությունը:

Սա ի՞նչ է, եթե ոչ ցեղապաշտություն:

Սա ի՞նչ է, եթե ոչ վհուկների որս:

Դա այն է, ինչ գերմանացիների հետ տեղի է ունեցել 1930-1940-ական թվականներին, ԱՄՆ-ում էլ` 1950-ականներին…

Հասկանում ենք` «Արդարություն և զարգացում» կուսակցությունը վարում է բանակը հյուծելու քաղաքականություն:

Բայց չէ՞ որ չի կարելի  գոտկատեղից ներքև այդքան հարվածել:

Ասենք` չգիտեմ ում ապուպապը հրեա է եղել կամ քրիստոնյա: Լա’վ, բայց քե՞զ ինչ: Եթե այդ լուրը գրողների և տպագրողների ընտանիքի արմատները բավարար չափով ուսումնասիրենք, արդյո՞ք վստահ կարող են լինել, թե իրենց բոլոր պապերը միայն թուրք և մահմեդական են դուրս գալու: Հատկապես Անատոլիայի նման մի վայրում, որտեղ լեզուն, կրոնն ու ազգությունը խառնված են…

Հնգամատյանը լի է հրեաների և պաղեստինցիների միջև մղվող անվերջանալի պատերազմների մասին պատմություններով: Պատերազմ, որը տևում է հազարամյակներ: Սակայն ըստ պատմաբանների` հրեաներն ունեն արաբական, իսկ պաղեստինցիները` կրետական ծագում: Եվ Անատոլիայում իրականացվող գենետիկ ուսումնասիրությունների ժամանակ թուրքերը, հայերը, արաբներն ու հրեաները իրար ազգակցական են դուրս գալիս: Ամեն ինչ կախված է նրանից, թե որքան ենք հետ գնում: Եթե ուզեք, կարող ենք հասնել մինչև անգամ Ադամին ու Եվային:

Թյուրքեր Ալքան

 t.alkan@yahoo.com.tr     

radikal.com.tr
30.06.2010