Այսօր Երևանում հրավիրված թուրք հասարակական գործիչ, Երիտասարդ միավորումների ասոցիացիայի նախագահ Սալիհ Յուջեի մամուլի ասուլիսը կիսատ մնաց։
Հասարական կազմակերպության ղեկավարը ասուլիսի հենց սկզբում իր թարգմանչի միջոցով տեղեկացրեց, որ ինքը չի պատասխանելու Հայոց ցեղասպանության մասին հարցերին, որովհետև ինքը Երևանում է որպես հասարակական կազմակերպության ղեկավար, և իր նպատակը երկու հասարակությունների միջև երկխոսության կայացմանը նպաստելն է։
«Սկզբից կուզենայի Ձեզ խնդրել, որ Հայոց ցեղասպանության մասին հարցեր չլինեն, եթե լինեն էլ, անպատասխան կմնան»,– հայտարարեց Սալիհ Յուջեն։ Այնուամենայնիվ, լրագրողական լսարանն իր հարցերը կապում էր Հայոց ցեղասպանության հետ, ինչը դուր չեկավ թուրք գործչին։ Նա բոլոր հարցերին պատասխանում էր, թե անցյալի հարցերը պարզաբանելը պատմաբանների գործն է, որ ինքը Երևանում է հասարակական գործունեության նպատակով և կպատասխանի միայն այդ հարթությունում տրվող հարցերին։
«Մենք միշտ պատրաստ ենք երկխոսության, և դա կախված չէ պատմական կամ քաղաքական հանգամանքներից»,– մոտավորապես այսպիսի պատասխան տվեց Սալիհ Յուջեն։
«Այս ամենի պարզաբանումն ընկնում է պատմաբանների վրա։ Եվ մենք սկզբից էլ զգուշացրինք, որ եթե խոսենք անցյալի մասին, մի անգամ եթե սկսեցինք խոսել, դրա տակից դուրս չենք գա։ Ամեն ինչ իր մասնագիտական նրբությունն ունի՝ քաղաքական թևն իր կտրվածքով է այս ամենին մոտենում, պատմաբաններն իրենք իրենց գործն են անում՝ պատմության հետ կապված, և մենք էլ՝ ՀԿ–ներս̦ մեր գործն ենք անում մեր կտրվածքով»,– հայտարարեց Սալիհ Յուջեն, երբ նրան հարցրին, թե արդյո՞ք կարելի է անցյալից խոսելուց հրաժարվելու ՀԿ ղեկավարի քայլը հասկանալ իբրև կոչ հայերին՝ մոռանալ անցյալում կատարվածը։
Երբ մոտ մեկ տասնյակի չափ հարցեր հնչեցին Հայոց ցեղասպանության մասին, Սալիհ Յուջեն հայտարարեց, որ իրենք պայմանավորվածություն են ունեցել մամուլի ակումբի տնօրինության հետ, որ խոսելու են միայն հասարակական խնդիրների մասին, բայց քանի որ շարունակվում են քաղաքական բնույթի, Հայոց ցեղասպանությանը վերաբերող հարցերը, իրենք նպատակահարմար չեն համարում մամուլի ասուլիսի շարունակությունը։
Tert.am, 30.04.10
Leave a Reply