Կենդանի գրադարան Բիլքենթում

 Անկարայում գտնվող Բիլքենթի համալսարանի Մշակույթի և հաղորդակցության կազմակերպությունը մտադիր է «Կենդանի գրադարան» նախագծով ջարդել կանխակալ կարծիքները: Էթնիկական, մշակութային, կրոնական, մասնագիտական և սեռական ինքնությունների պատճառով հասարակության մեջ չսիրված անձանց ներկայացնող «կենդանի գրքերը» ուսանողներին են ներկայացվելու Բիլքենթ համալսարանի Գարնանային փառատոնի ընթացքում: Կենդանի գրադարանում մարդկանց կազմած «գրքերը» անձնական երկխոսության մեջ են մտնում իրենց ընթերցողների հետ: Ընթերցողները որոշակի ժամանակահատվածում հնարավորություն են ունենում զրուցել այն ՙգրքերի՚, այսինքն` անձանց հետ, որոնց ընտրել են քարտարանից: Կենդանի գրադարանում, որը նպատակ ունի ջարդել սոցիալական արհամարհանքի ենթարկված անձանց հանդեպ եղած կարծրատիպերը և համակրանք մտցնել հասարակությունից «օտարացված» մարդկանց նկատմամբ, ներկայացված են լինելու հետևյալ ՙգրքերը՚՝ «նախկին թմրամոլ», «տրավեստի», «արվամոլ», «հրեա», «լեսբուհի», «քուրդ», «պոռնիկ», «ծանր հանցագործության համար դատապարտված», «աթեիստ», «շիզոֆրենիկ», «կրոնափոխ (իսլամից քրիստոնեության անցած)», «HIV+», «հայ», «գլխաշոր կրող», «էրոտիկ ֆիլմի դերասան», «ոստիկան» և այլն:

Ռադիկալ օրաթերթ,  29.04.2010