«Պետությունը պետք է ներողություն խնդրի հայերից, քրդերից ու թուրքերից»

Թուրքիայի Խաղաղություն և ժողովրդավարություն կուսակցության անդամ̦ Բիթլիսի պատգամավոր Նեզիր Քարաբաշը, առաջ քաշելով այն գաղափարը, ըստ որի` 1915 թ. հայերը կոտորածի են ենթարկվել, խոսեց Թուրքիայի հանրապետության կառավարության՝ ներողություն խնդրելու անհրաժեշտության մասին:

Խաղաղություն և ժողովրդավարություն կուսակցության նահանգային կոնգրեսը տեղի ունեցավ այսօր Թաչ Դյուղյուն սրահում, որտեղ ոչ մի դրոշ չկար` Խաղաղություն և ժողովրդավարություն կուսակցության դրոշից բացի: Նախագահողի թե’ թուրքերեն և թե’ քրդերեն ներկայացրած ելույթի ժամանակ մասնակիցները հաղթանակի նշան արեցին: Խաղաղություն և ժողովրդավարություն կուսակցության Բիթլիսի պատգամավոր Նեզիր Քարաբաշը ևս իր ելույթի առաջին մասը ներկայացրեց քրդերենով: Նրա խոսքը ժամանակ առ ժամանակ ընդհատվում էր «Թող ջարդվե´ն երեխաներին ուղղված ձեռքերը» կարգախոսներով: Նեզիր Քարաբաշը նշեց, որ Թուրքիան մանուկների հանդեպ բռնություններ իրականացնող երկրներից մեկն է աշխարհում:

Կոնգրեսում, որի ընթացքում հնչեցվեց «Մարդասպան պետությունը հաշիվ է տալու» կարգախոսը, Նեզիր Քարաբաշը, առաջ քաշելով այն միտքը, թե 1915 թ. հայերի դեմ կոտորածներ են իրականացվել, հետևյալն ասաց. «1915 թ. մոտ մեկ միլիոն հայեր են կոտորվել: Նրանց թիվը էական չէ. հայերն ու բազմաթիվ պատմաբաններ ասում են, թե 1 ու կես միլիոն է, Թուրքիայի պաշտոնական տեսակետով էլ եղել են 300-500 հազար: Նրանց քշեցին իրենց տնից ու տեղից: Նրանց` կին ու երեխա, աքսորեցին Թուրքիայի բոլոր կողմերից, քանզի հայերը եթե անգամ հիմնականում բնակվում էին Արևելյան և Հարավարևելյան Անատոլիայում, բայց և այնպես` նրանք ապրում էին անխտիր Թուրքիայի բոլոր շրջաններում: Թուրքիայի բոլոր կողմերից միլիոնից ավելի հայ տնից-տեղից կտրվեց և աքսորվեց Սիրիայի անապատները: Նրանց մեծ մասն սպանվեց Հատուկ կազմակերպության (Թեշքիլաթ-ի մահսուսա) մարդասպանների կողմից: Մի մեծ մաս սպանվեց տարբեր շրջանակների կողմից, որոնք նպատակ էին հետապնդում խլել նրանց ինչքն ու գույքը:  Մի մեծ մաս էլ իր կյանքը կորցրեց ճանապարհին: Թուրքիան,  փոխանակ այս ճշմարտությունները երկրի ներսում քննարկելով,  գնահատական տա դրանց և, ինչպես դա արեցին աշխարհի բազմաթիվ երկրներ, այս փաստերը բացահայտելով` ներում հայցի, դեռ շարունակում է ձևացնել, թե իբր նման դեպք չի պատահել: Թուրքիայի հանրապետության  կառավարությունը պարտավոր է ներողություն խնդրել 3 ժողովդրից: Հայ ժողովրդից ներում պետք է հայցի այդ կոտորածները կատարելու, քուրդ ժողովրդից` նրան որոշ մեղքերի մեջ ներքաշելու և թուրք ժողովրդից էլ` 90 տարի շարունակ փաստերն աղավաղելով գաղտնի պահելու համար:

haberturk.com, 25.4.2010