ՙՑեղասպանության՚ պատճառով վիճաբանություն կայարանում

Մարդու իրավունքների կազմակերպությունը պնդեց, թե ՙ1915-ին սպանվել են 220 հայ մտավորականներ՚: Թոշակառու դիվանագետների և Մարդու իրավունքների կազմակերպության անդամների միջև խոսքակռիվ սկսվեց:

Մարդու իրավունքների կազմակերպության անդամներից բաղկացած մի խումբ Հայդարփաշա կայարանում նստացույց արեց`1915թּ ապրիլի 24-ի ենթադրյալ իրադարձությունների կապակցությամբ իր բողոքն արտահայտելու նպատակով: Կայարանի մուտքի մոտ հավաքված ՙՄարդու իրավունքների կազմակերպության ստամբուլյան մասնաճյուղի` Ցեղապաշտության ու խտրականության դեմ պայքարող հանձնաժողովի՚ անդամներից կազմված խումբը նստացույցն արեց այն ՙ220 հայ մտավորականների՚ լուսանկարներով, որոնց առնչությամբ պնդվում է, թե 1915թ. ապրիլի 24-ին ձերբակալվելուց հետո այլևս լուր չի ստացվել նրանց մասին: Խմբի անունից ելույթ ունեցած փաստաբան Էրեն Քեսքինը պնդեց, թե ոտնձգություն է կատարվել ոչ միայն հայերի կյանքի նկատմամբ, այլև նրանցից խլվել է նաև ինչքը, գույքը և պատմությունը:

Մյուս կողմից ընդդիմադիրների մի խումբ, որոնց մեջ կային նաև թոշակի անցած արտակարգ և լիազոր դեսպաններ ու փաշաներ, իր բողոքն արտահայտեց նստացույցի մասնակիցներին: Սույն խմբի անունից պարզաբանումներով հանդես եկած բանակի զորացրված գեներալ Էդիփ Բաշերը նշելով, թե ցեղասպանության պնդումն արհեստական է և սուտ, հավելեց. ՙՆման միջոցառման անցկացումը Թուրքիայում, ըստ իս, ուղղակի ամոթալի է: Իմ կարծիքով` շատ սխալ է ցեղասպանության ընդունումը Թուրքիայում և այսպիսի միջոցառումների կազմակերպումը` ասելով, թե ՙԱյո´, թուրքերը ցեղասպանություն են կատարել՚:

Այս երկու խմբի փոխադարձ խոսքակռիվն ընդհատվեց անվտանգության ուժերի միջամտության շնորհիվ:

Հայոց ցեղասպանության պնդումների դեմ բողոքեցին Թուրքիայի բազմաթիվ վայրերում:

 Սթար օրաթերթ, 25.4.2010