Եթե Աղթամարում սահմանափակում լինի, պատարագ չեմ մատուցի

Պատրիարք Մեսրոպ Երկրորդի հիվանդությունից հետո հայկական համայնքի ամենաազդեցիկ անձը հանդիսացող Թուրքիայի հայերի Հոգևոր խորհրդի նախագահ Արամ Աթեշյանը հայտնեց, որ ինքը ոչ մի պաշտոնական գրություն չի ստացել Աղթամար կղզում գտնվող Սուրբ խաչ եկեղեցում տարին մեկ անգամ պատարագ մատուցելու թույլտվության մասին:

Աթեշյանն ասաց նաև հետևյալը. «Ես որևէ սահմանափակում չեմ ընդունի Սուրբ խաչ եկեղեցում մատուցվելիք պատարագի ընթացքի կամ մասնակիցների թվի առումով: Եթե ցանկանան նման սահմանափակում կամ կրճատում անել, ես պատարագ չեմ մատուցի»:

Չպետք է ասվի, թե քվոտան լրացավ

Աթեշյանը նշեց նաև հետևյալը. «Այս վայրը համայն հայության համար վերին աստիճանի կարևոր է: Արարողության համար ողջ աշխարհից հազարավոր մարդիկ կգան: Մի՞թե կարելի է եկած մարդկանց ասել, թե քվոտան լրացավ, եղբայրս, դու չես կարող կղզի բարձրանալ: Կամ, երբ եկեղեցում պատարագ մատուցվի, մի՞թե կարելի է ասել, թե  «Ժամանակը լրացավ, այլևս վերջ տվեք արարողությանը»: Պատկերացրեք, որ դեռ  այժմվանից Վանում գտնվող հյուրանոցներում տեղ չի մնացել: Այդ մարդիկ այստեղ գալիս են ոչ թե տուրիստական ճամփորդության, այլ պատարագին մասնակցելու համար: Մենք ուզում ենք սեպտեմբերի 12-ը, այսինքն` Սուրբ խաչը նշել ժողովրդական խաղերի և երգչախմբերի հետ մեկտեղ: Մենք, Երևանի, Երուսաղեմի և Բեյրութի գլխավորությամբ, աշխարհի չորս կողմերից ներկայացուցիչներ ենք հրավիրելու»:

Խաչը սպասում է թանգարանում

Աթեշյանը շեշտելով, որ իրենք պահանջել են եկեղեցու վրա գրել Սուրբ խաչ անվանումը և տեղադրել այն խաչը, որը նվիրերել է Պոլսո հայոց պատրիարք Մեսրոպ Երկրորդը, հավելեց. «Դա մեր ամենաբնական իրավունքն է: Մեր պատրիարքի կողմից ուղարկված խաչը սպասում է թանգարանում: Այնպես են Աղթամար եկեղեցի կոչում, կարծես եկեղեցին անուն չունի: Մենք պահանջում ենք, որպեսզի եկեղեցու անունը գրվի, և խաչը տեղադրվի»:

hurriyet.com.tr, 22.04.2010, Սեֆա Քափլան