Պնդում, ըստ որի` քրիստոնյա աշակերտին ծեծել են իսլամ դավանելու վկայության բանաձևը չարտասանելու համար

Ըստ ստացված տեղեկության` Դիարբեքիրում ընտանյոք հանդերձ դավանափոխ եղած և բողոքականություն ընդունած տարրական դպրոցի աշակերտ Հ.Բ.-ն ծեծի է ենթարկվել ուսուցչի կողմից` կրոնի դասին իսլամ դավանելու վկայության բանաձևը չարտասանելու պատճառով: Նահանգապետարանը սկսել է գործը հետաքննել` քրիստոնյա ընտանիքի բողոքի հիման վրա:

Ընտանիքի հետ մեկտեղ 2008 թ. կրոնափոխ եղած և Թուրքիայի հարավարևելյան շրջանների միակ բողոքական համայնքին միացած տարրական դպրոցի 5-րդ դասարանի աշակերտ Հ.Բ.-ն 2009-2010 թթ. ուսումնական տարվա սկզբին ընդունվել է Բաղլար գավառում գտնվող Էջզաջըլար տարրական դպրոցը: Քանի որ Հ.Բ.-ի անձը հաստատող փաստաթղթում որպես դավանած կրոն նշված է եղել իսլամը, Հ.Բ.-ն հարկադրաբար ներգրավվել է կրոնական մշակույթի և բարոյագիտության դասընթացին: Ըստ պնդումների` դասերի ժամանակ անուշադիր և գրավորների մեջ անհաջողակ Հ.Բ.-ն գրավել է կրոնական մշակույթի ուսուցիչ Ա.Դ.-ի ուշադրությունը: Ուսուցիչ Ա.Դ.-ն մոտավորապես 3 շաբաթ առաջ, առանց իմանալու, որ Հ.Բ.-ն քրիստոնյա է, կշտամբել է վերջինիս, քանի որ Հ.Բ.-ն չի կարողացել պատասխանել կրոնի մասին ուսուցչի  տված հարցերին: Այնուհետև ուսուցիչ Ա.Դ.-ն պահանջել է, որ ամբողջ դասարանը միաբերան 3 անգամ արտասանի իսլամ դավանելու վկայության բանաձևը, սակայն Հ.Բ.-ն չի կատարել առաջադրանքը: Ուսուցիչը հարցրել է, թե ինչու նա չի միանում իր ընկերներին, որին ի պատասխան Հ.Բ.-ն ասել է հետևյալը. ՙԵս եկեղեցի եմ հաճախում: Իսլամ դավանելու մասին վկայության բանաձևը չգիտեմ և սովորելու ցանկություն էլ չունեմ՚:

Ըստ պնդումների` ուսուցիչ Ա.Դ.-ն հենց այդ պատասխանից հետո էլ ապտակել է աշակերտին:

Անձը հաստատող նոր վկայական

Երբ Հ.Բ.-ն դպրոցում կատարվածի մասին տեղեկացրել է իր ընտանիքին, հայրը` 2008 թ. իր 7 երեխաների և կնոջ հետ միասին հավատափոխ եղած և բողոքական համայնքին միացած Աբդուլհեքիմ Բ.-ն, դիմել է Դիարբեքիրի նահանգապետարանին և Ազգային կրթության տնօրինությանը` ուսուցչին ու դպրոցի ղեկավարությանն ուղղված մեղադրանքով: Հետագայում Բաղլար գավառի Բնակչության հաշվառման տնօրինությանը դիմում ներկայացրած հայրը Իրանում ծնված որդու` Հ.Բ.-ի անձը հաստատող փաստաթղթում որպես դավանող կրոն նշված իսլամը փոխարինել է քրիստոնեությամբ: Դպրոցին էլ խնդրագիր է ներկայացրել, որպեսզի երեխան ազատվի կրոնի դասերից: Հաղորդվեց, որ Հ.Բ.-ն 3 շաբաթ է, ինչ չի մասնակցում կրոնի դասընթացին:

ՙՇարքով մեկ ծեծի են ենթարկվել՚

Հ.Բ.-ն պնդեց, թե իր հետ միասին ուրիշ աշակերտներ էլ են ծեծի ենթարկվել` ուսուցչի տված հարցերին պատասխանել չկարողանալու համար: Հ.Բ.-ն. պնդելով, որ ուսուցիչն անընդմեջ ծաղրել է իրեն, հայտնեց հետևյալը. ՙՔանի որ ես շատ էի ձանձրանում կրոնի դասերին և դասի ժամանակ զրուցում ընկերներիս հետ, նա բարկանում էր ինձ վրա և բարձր դասարանների համար նախատեսված հարցեր տալիս: Վրդովվում էր, երբ չէի կարողանում դրանց պատասխանել: Երբ ես հայտնեցի, որ եկեղեցի եմ հաճախում, դրանից հետո էլ սկսեց եկեղեցու հետ առնչվող հարցեր ինձ ուղղել և ծաղրել` ասելով` ՙԴե ասա տեսնեմ, թե ինչպես են խաչ հանում՚: Ի վերջո, քանի որ չկարողացա պատասխանել իսլամ դավանելու մասին վկայության բանաձևին վերաբերող հարցին, ապտակեց ինձ և իմ մի քանի ընկերների՚:

Բաղլար գավառի կայմակամ Մեհմեդ Ջենգիզ Յուջեդալը, ընդգծելով խնդրի զգայուն լինելու հանգամանքը, նաև հետևյալն ասաց այդ կապակցությամբ. ՙՀ.Բ.-ի ընտանիքի հայցադիմումին շատ լուրջ վերաբերվելու պատճառով բազմակողմանի հետաքննություն ենք սկսել: Արդեն ցուցմունքներ ենք վերցրել ուսուցչից և դպրոցի ղեկավարությունից: Շարունակվում է մեր կողմից նշանակված տեսուչների կողմից անցկացվող  հարցաքննությունը՚:

ՙՀարցերը չիմացող աշակերտներին կշտամբել եմ, բայց չեմ ծեծել՚:

Էջզաջըլար տարրական դպրոցի կրոնական մշակույթի ուսուցիչ Ա.Դ.-ն, ժխտելով ծեծի մասին պնդումը, նշեց. ՙԵս տեղյակ չէի, որ տվյալ աշակերտն այլ կրոն էր դավանում: Ես դասավանդում էի այն բոլոր թեմաների մանրամասները, որոնք տեղ էին գտել  դպրոցական դասագրքում: Ես ժամանակ առ ժամանակ աշակերտներիս հարցեր եմ տալիս` տվյալ թեմաների անչությամբ: Պատահել է, որ դասը չլսող և առաջադրանքները չկատարող աշակերտների վրա գոռամ, բայց ձեռքերիս երբևէ ազատություն չեմ տվել: Այն աշակերտը, որի քրիստոնյա լինելու մասին իմացել եմ հետագայում, արդեն իսկ այլևս չի մասնակցում իմ դասերին` իր անձնագիրը փոխելուց հետո՚:

ՙԱղջիկս, թո’ղ քո գյավուրությունը՚

 Դիարբեքիրի բողոքական եկեղեցու հոգևոր առաջնորդ Ահմեդ Գյուվեները հայտնելով, որ վերջերս ավելացել են աշակերտներին ուղղված բռնությունների դեպքերը, հավելեց. ՙՄեր երեխաները ճնշումների են ենթարկվում ոչ միայն աշակերտների, այլև  ուսուցիչների կողմից: İMKB լիցեյում ուսանող դստերս` Սևինչին, ուսուցիչը հենց իմ աչքերի առաջ բարձրաձայն ասաց. ՙՍևինչ, մի կո՜ղմ թող գյավուրությունդ՚:  Մեր զավակներին վիրավորանքներ են հասցնում այլ կրոնների պատկանելու պատճառով:  

 haberturk.com, 17.04.2010, Ահմեդ Յուքուշ