Վանում գտնվող Հայոց պատրիարքի հոգևոր խորհրդի նախագահ արքեպիսկոպոս Արամ Աթեշյանը, նահանգապետ Մյունիր Քարաօղլուին այցելելուց հետո, գնաց Աղթամարի եկեղեցին, որտեղ 2010 թ. սեպտեմբերի 12-ին կատարվելու է կրոնական արարողություն: Մակույկով դեպի կղզի շարժվող Աթեշյանի համար ձեռնարկվեցին անվտանգության միջոցառումներ: Աթեշյանը Վանի փոխնահանգապետ Հալիլ Բերքին և Գևաշի կայմակամ Թահսին Աքսուին մեկ առ մեկ բացատրեց այն բոլոր միջոցառումները, որոնք պետք է ձեռնարկվեն 2 ժամանոց արարողության համար:
Աթեշյանը հայտնելով, թե արարողությունը լավագույնս անցկացնելու համար մտածել են բոլոր մանրամասնությունների մասին, ասաց նաև, որ իրենց հնարավորությունների սահմաններում կանեն ամեն ինչ, որպեսզի տվյալ օրն անցնի տոնական մթնոլորտում: Աթեշյանն ընդգծելով, որ իրենց ցանկությունն է վերակենդանացնել այն եղբայրությունը, որը թուրքերի և հայերի միջև եղել է անցյալում, նշեց նաև, թե իրենց երազանքն է եղել Աղթամար եկեղեցում կրոնական արարողություն իրականացնելը, և որ իրենք ապրում են այդ երազանքն իրականություն դարձնելու ուրախությունը: Աթեշյանն ասաց նաև հետևյալը. «Պաշտամունքի այս վայրում երկար ժամանակ զանգի և ժամերգության ձայն չի լսվել: Այսչափ երկար ժամանակամիջոցից հետո բոլորի երազանքն այն էր, թե երբ է այստեղ կրկին ժամերգություն լինելու, երբ է եկեղեցում արարողություն կատարվելու: Այդ երազանքը վերջին շրջանում իրականություն է դառնում մեր նոր կառավարության շնորհիվ: Սեպտեմբերի 12-ին Անատոլիայում մեծ արարողություններ են արվելու: Բոլորը դաշտահանդեսի են դուրս գալու, մատաղ անելու: Որքան էլ որ մեր եկեղեցում զոհ չի մատուցվում, Անատոլիայում ապրող մարդիկ մատաղի անվան տակ փառատոներ են կազմակերպում: Ես նույնպես ցանկանում եմ, որ այդ օրը փառատոնի վերածենք»:
Արարողությանը մասնակցելու է 5000 հոգի
Աթեշյան ասաց, որ արարողությանը կմասնակցեն աշխարհի բոլոր ծագերից եկած առնվազն 5000 հոգի. «Բեյրութի, Իսրայելի, Երուսաղեմի հայերը, Ամերիկայի, Եվրոպայի մեր եղբայրները` բոլորը, հուզմունքով սպասում են այդ օրվան: Հուսով եմ` անվտանգության տեսանկյունից խնդիրներ չեն լինի: Այդ օրը գեղեցիկ ձևով մեր արարողությունը կկատարենք` առանց խնդիրների, առանց այնպիսի մի միջադեպի, որը կվշտացներ ոմանց: Համոզված ենք, որ ինչպես պատմության մեջ երկու հասարակությունները եղբայրաբար ապրել են, նույն կերպ այդ օրը կլինի: Կհիշենք հին օրերը: Հայերն ու թուրքերն այդ օրը կեղբայրանան: Սակայն անհանգիստ ենք` անվտանգության հարցի կապակցությամբ: Տեղյակ եք, որ այս վերջին շաբաթվա ընթացքում մի քանի հոգի վիրավորվել է: Նրանք ենթարկվել էին հարձակման: Քանի որ այդ եկողները հայ են լինելու, բնականաբար նրանք կարող են հանդիպել ծայրահեղ պահպանողականների: Դրա դեմ միջոցներ արդեն իսկ ձեռնարկվում են: Բայց պետք է միշտ այնպիսի միջոցներ ձեռնարկել, այնպես վերաբերվել, կարծես իրոք որևէ միջադեպ է սպասվում: Ես կնախընտրեմ, որ նման դեպքեր չգրանցվեն: Հավատում եմ, որ չեն լինելու»:
Եկեղեցում զանգի ձայն չի լսվելու
Աթեշյանը, եկեղեցու շուրջ հրավիրյալների և արարողության մասնակիցների համար ամենահարմար վայրերը ուսումնասիրելով, հայտնեց, որ եկեղեցու վրա զանգ տեղադրելու մասին պահանջներ չեն եղել և հավելեց. «Եթե զանգ տեղադրենք, ապա անհրաժեշտ կլինի, որ արարողությունների ժամանակ առավոտ-երեկո այն հնչի, բայց քանի որ մենք այստեղ տարին մեկ անգամ ենք պատարագ մատուցելու, մեր ծրագրում զանգ չի նախատեսվում: Այդ հարցի վրա առանձնապես կանգ չենք առնում: Շատ էական չէ: Սակայն մեր խաչը պատրաստ է: Խաչ տեղադրել-չտեղադրելու խնդիրը պետք է լուծի Մշակույթի նախարարությունը: Պատարագի առնչությամբ նրանց կողմից որևէ խոչընդոտ չկա: Մենք մեր արարողությունն այս պարտեզում էլ կարող ենք անել: Ես որտեղ էլ օծված սեղանս բացեմ, այդ վայրը մեզ համար եկեղեցի է: Քանզի մենք պատարագ ենք մատուցում նաև այն քաղաքների հասարակ տներում, որտեղ եկեղեցի չկա»:
Ուղարկելու է Աբդուլ Համիդի մակագրության թուրքերեն օրինակը
Եկեղեցու ներսում ուսումնասիրություններ կատարած Աթեշյանը ուշադրությամբ ընթերցեց այն շնորհակալագիրը, որ Աբդուլ Համիդին էին հղել հայ առաջնորդները` Աղթամարի եկեղեցու համար Աբդուլ Համիդի կատարած ներդրումների կապակցությամբ: Աթեշյանը նկատելով, որ մակագրությունը թուրքերեն օրինակ չունի, լուսանկարեց այն և հայտնեց, որ կուղարկի թուրքերենով տարբերակը: Աթեշյանը, Աղթամար եկեղեցու առջև որպես հիշատակ լուսանկարվելով, գնեց Աղթամարի եկեղեցու և Վանա կատվի արձանիկներ և հեռացավ կղզուց:
Leave a Reply