Թուրքիայի Բարձրագույն կրթության հանձնաժողովի գործադիր խորհրդի անդամ, դոկտոր, պրոֆեսոր Դուրմուշ Գյունայը հայտնեց հետևյալը. «Անկարայի համալսարանից ստացված հայոց լեզվի դասավանդման ծրագրի հարցը քննարկվել և ընդունվել է Բարձրագույն կրթության հանձնաժողովում: Նախատեսում ենք, որ այդ ծրագրով առաջիկա տարվա մեջ կսկսենք դասավանդումը»:
Գյունայը նշեց նաև, որ տարբեր պետական հաստատություններից հայերենին տիրապետող կադրերի պահանջ է ստացվել: Հայտնելով, որ Թուրքիայում շատ քիչ մարդ է հայերենին տիրապետում, և որ այդ պատճառով էլ հայոց լեզուն իմացող մարդկանց պահանջ կա, Գյունայն ասաց, որ Թուրքիայի համալսարաններն այլևս բաց են աշխարհի առաջ. «Այլևս փոխվել է համալսարանական այն ընկալումը, որ կար սրանից 20-30 տարի առաջ: Տեղի է ունենում համաշխարհայնացման գործընթաց: Այդ համատեքստում ունենք այնպիսի մարդկանց պոտենցիալի կարիք, որոնք կրթություն ստացած կլինեն բոլոր լեզուներով: Մենք քննություն ենք ընդունել նաև արտասահմանյան երկրների հպատակություն ունեցող ուսանողներից: Ցանկանում ենք Թուրքիայի համալսարանները բացել ողջ աշխարհի առջև: Հետևաբար` կա բոլոր լեզուներով կրթություն ստացած մարդկանց պոտենցիալի կարիք: Այդ պատճառով էլ նախ խրախուսում ենք անգլերեն լեզվի իմացությունը: Այսօր անգլերենը վերածվել է միջազգային լեզվի»:
Դոկտոր, պրոֆեսոր Դուրմուշ Գյունայն ընդգծելով, որ համալսարաններում ծրագրերի ընտրությունը կատարվում է համալսարանի ղեկավարության կողմից, հետևյալ կերպ շարունակեց իր խոսքը. «Թուրքիայի Բարձրագույն կրթության հանձնաժողովն էլ, համալսարաններից ստացված պահանջները քննարկելով, որոշում է նոր ծրագրեր ընդգրկել-չընդգրկելու հարցը: Մեր համալսարաններն ազատ են այդ հարցում: Անկարայի համալսարանից ստացված հայոց լեզվի դասավանդման ծրագրի հարցը քննարկվել և ընդունվել է Բարձրագույն կրթության հանձնաժողովում: Նախատեսում ենք, որ այդ ծրագրով առաջիկա տարվա մեջ կսկսենք դասավանդումը»:
milliyet.com.tr 13.4.2010
Leave a Reply