Վերականգնվելու է Սուրբ Երրորդություն եկեղեցին

Վերականգնվելու է Էսքիշեհիրի Սիվրիհիսար գավառում 1881 թ. կառուցված եւ Անատոլիայի ամենամեծ հայկական եկեղեցիներից մեկը հանդիսացող Սուրբ Երրորդություն եկեղեցին: Սիվրիհիսարի քաղաքապետ Ֆիքրեթ Արսլանը, Անադոլու գործակալության թղթակցին տված իր հարցազրույցում նշելով, թե բազմաթիվ քաղաքակրթությունների օրրան Սիվրիհիսարում գտնվում են քաղաքացիական ճարտարապետության ամենագեղեցիկ նմուշները, հիշեցրեց նաեւ, որ Ուլու մզկիթը, Աղա օթեւանատունը, Օսմանյան տներն ու հայկական եկեղեցին գավառի պատմական կառույցներից են: Արսլանը տեղեկացրեց, որ Սիվրիհիսարի պատմական ժառանգությունը գալիք սերունդներին թողնելու համար նախագծեր են մշակվում: Նա այդ կապակցությամբ ասաց. Քաղաքապետարանի առօրյա ծառայություններից բացի `մշակել ենք նախագծեր` պատմական շինությունները վերականգնելու ուղղությամբ: Ավարտել ենք Զայիմ Աղա օթեւանատան ու որոշ Օսմանյան տների վերականգնումը: Վերանորոգելու ենք նաեւ սելջուկյան ժամանակաշրջանից մեր օրերը հասած ամենանշանավոր կառույցներից մեկը հանդիսացող Ուլու մզկիթն ու պատմական ժամացույցի աշտարակը: Այդպիսով տեր ենք կանգնելու մեր անցյալին : Այդ նպատակով վերականգնելու ենք նաեւ մեր գավառում 1881 թ. կառուցված հայկական եկեղեցին եւ հայկական բաղնիքը:

 Գծագրերը ապահով տեղում ենք պահում

 Արսլանը տեղեկացրեց, որ Սուրբ Երրորդություն եկեղեցին Անատոլիայի ամենամեծ եկեղեցիներից մեկն է, հոյակապ շինությամբ աչքի ընկնող այս եկեղեցին երկար ժամանակ օգտագործվել է որպես պահեստ: Մոտ 20 տարի լքված եկեղեցու երկու կողմերում զանգակատներ են եղել. Ուշադրություն են գրավում հատկապես եկեղեցու մուտքի դռան վրա արված հրեշտակների գծագրերը: Կողոպտվելու վտանգի տակ գտնվող այս գծագրերը պահում ենք ապահով մի տեղում: Եկեղեցում կան նաեւ Սուրբ Մարիամ Աստվածածնի պատկերներ, որմնանկարներ եւ գրություններ: Եկեղեցին անգամ այդ վիճակում այցելուներ է ունենում: Այցելությունները վերջին տարիներին շատացել են: Եկեղեցին, որը վերականգնվելու է Մշակույթի եւ զբոսաշրջության նախարարության կողմից `իր բուն տեսքին համապատասխան, վերածվելու է մշակույթի տան, որում տեղ են գտնելու ցուցադրությունների սրահ, համերգասրահ եւ ժողովասրահ: Միջին Արեւելքի տեխնիկական համալսարանը (ODTU) եւ Գազի համալսարանն իրականացնելու են շրջակայքի բարեկարգումը: Նաեւ եկեղեցի տանող ճանապարհներ ենք բացելու:

Նահանգի Մշակույթի եւ զբոսաշրջության տնօրեն Ալի Օսման Գյուլը եւս նշելով, որ Սիվրիհիսարի եկեղեցին վերականգնվելու է Թուրքիայի Մշակույթի եւ զբոսաշրջության նախարարության կողմից, հայտնեց, որ նախագծային աշխատանքները հասել են վերջին փուլին: Գյուլն ասաց, որ վերականգնման համար վճարումներ են հատկացվել, որոնք շուտով փոխանցվելու են: Նա պարզաբանեց . Աշխատանքները շատ շուտով կսկվեն: Երբ դրանք ավարտվեն, եկեղեցին կգործի որպես մշակութային կենտրոն: Վերջին տարիներին աշխուժացած այս գավառը կնպաստի նաեւ զբոսաշրջության զարգացմանը: Կավելանա եկեղեցի այցելողների թիվը:

 Անադոլու գործակալություն

http://www.emlakkulisi.com/35706_surp_yerortutyun_kilisesi_restore_edilecek_