Թուրքիոյ ընդդիմադիր Հանրապետական ժողովուրդի կուսակցութեան ղեկավար Տենիզ Պայքալ յայտարարած է, որ Թուրքիոյ վարչապետ Ռեճեփ Թայիփ Էրտողանի` Թուրքիոյ մէջ ապօրինի կերպով բնակող հայերը արտաքսելու մասին յայտարարութիւնը վտանգաւոր է եւ կը հակասէ մարդկային իրաւանց սկզբունքներուն:
«Աշխատելու համար Թուրքիա ժամանած մարդիկը որեւէ վէճի լուծման համար իբրեւ յաղթաթուղթ օգտագործելու ցանկութիւնը անընդունելի է եւ կը հակասէ մարդկային իրաւանց սկզբունքներուն», յայտարարած է Պայքալ:
Միւս կողմէ` Թուրքիոյ աշխատանքի եւ ընկերային հարցերու նախկին նախարար Եաշար Օքույան «Պի.Պի.Սի.»ի թրքական գործակալութեան հետ հարցազրոյցի մը ընթացքին յայտարարած է, թէ Էրտողանի յայտարարութեան համար մտադիր է դատական պատասխանատուութեան կանչել Թուրքիոյ վարչապետը:
Ըստ Օքույանի, Էրտողանի յայտարարութիւնը կ՛ապացուցէ, որ երկրին մէջ ապօրինի գաղթականներ կան, եւ կառավարութիւնը ոչինչ կ՛ընէ այդ խնդիրի լուծման ուղղութեամբ: «Թուրքիոյ սահմանադրութեան համաձայն, ատիկա օրէնքի խախտում է եւ ծառայողական պարտականութիւններուն մէջ թերացում», ընդգծած է նախկին նախարարը:
Leave a Reply