Ադանայի սխտորով կոլոլակ /քյուֆթա/

Անհրաժեշտ պարագաները

Կոլոլակի խմորի համար` 2 ջրի բաժակ մանր բլղուր, 5 ճաշի գդալ ալյուր, 1+ 2/3 բաժակ ջուր, 2 թեյի գդալ աղ:

Սխտորով սոուսի համար` 10 պճեղ ծեծած սխտոր, 7,5 ճաշի գդալ ձիթապտղի յուղ, 1 ճաշի գդալ տոմատի մածուկ, 2 թեյի գդալ կարմիր պղպեղ /փոշին/:

Կոլոլակը զարդարելու համար` 1 կապոց մաղադանոս /ըստ ցանկության/:

Պատրաստման եղանակը

Բլղուրը լցնել մի լայն ամանի մեջ, ավելացնել աղ: Մի բաժակ ջուր ժամանակ առ ժամանակ լցնելով` 10-15 րոպե խմոր հունցել: Ավելացնել ալյուր: 2/3 բաժակ ջուր ավելացնելով` 10 րոպե ևս հունցել: Վրան կտորով ծածկել: Ջրով թրջելով` պնդուկի մեծությամբ կոլոլակներ պատրաստել, մեջերը փոսեր գոյացնել: Կոլոլակները անցքերով քամիչի մեջ տեղավորել, կափարիչը փակել և եփել եռացող ջրի գոլորշիով: Սոուսը պատրաստելու համար յուղը տաքացնել, վրան ավելացնել սխտորը: Մի քիչ խառնելուց հետո ավելացնել տոմատի մածուկը, ցանել կարմիր պղպեղը, խաշած ջրից կես բաժակ վերցնելով` ավելացնել սոուսին և մի փոքր էլ եռացնել: Եփած կոլոլակները վրան դնել և մի քանի րոպե ևս եռացնել: Մաղադանոսը բարակ կտրատելով` խառնել կոլոլակների հետ: