Տրապիզոնի նահանգ (համառոտ)

Տրապիզոնի նահանգ, Դրապզունի նահանգ, Տրապեզոնդի նահանգ – Նահանգ (վիլայեթ), փաշայություն, երկրամաս Թուրքիայում, նրա հյուսիսարևելյան մասում: Համապատասխանում է պատմական Խաղտիքին և Լազիկայի մի մասին: Տարածքը՝ 32400 քառ կմ, կենտրոնը՝ Տրապիզոն քաղաքը: Բաժանված էր 4 գավառի (սանջակ)՝ Սամսոն, Տրապիզոն, Լազիստան և Գյումուշխանե: Հետագայում ավելացան Օրդուն ե Կերասունը: Գավառակները 19-ն էին, գյուղախմբերը՝ 24:

Ըստ տարբեր աղբյուրների` բնակչության թիվը 1900 թ. մարդահամարի տվյալներով կազմում էր 1.200.000 բնակիչ, որից կրոնափոխ հայեր 60.000 և հայ քրիստոնյաներ՝ 60.000, 1908 թ մարդահամարով՝ 1.387.164 բնակիչ, որից հայեր ու հույներ՝ 46.789: Ըստ այլ աղբյուրների՝ 1912-ին նահանգում կար 100.000 հայ բնակիչ, ըստ Թեոդիկի «Ամենուն տարեցոյց»–ի՝ 1915 թ. Մեծ եղեռնից առաջ այստեղ կար 65000 հայ բնակիչ, սակայն ջարդերից փրկվեց միայն 15 հազարը, ըստ Լեփսիուսի՝ այդ ժամանակ հայերի թիվը հասնում Էր 53 հազ մարդու:

Նահանգում բնակվում Էին նաև լազեր, հույներ, թուրքեր, չերքեզներ, ասորիներ: Զբաղվում Էին եգիպտացորենի, ծխախոտի, վուշի, կանեփի, պտղատուների, ցիտրուսների մշակությամբ, անասնապահությամբ, ձկնորսությամբ, արհեստներով, առևտրով: Նահանգն ունի արծաթի, կապարի, պղնձի պաշարներ, հանքային ջրեր:

Քաղաքներից են Սամսոնը, Օրդուն, Կերասունը, Գյումուշխանեն, Ռիզեն և այլն: 1970 թ. մարդահամարի տվյալներով Տրապիզոնի նահանգն ուներ 659 000 բնակիչ: